ਅਜਨਾਲਾ: ਸੰਯੁਕਤ ਕਿਸਾਨ ਮੋਰਚਾ ਦੇ ਬੈਨਰ ਹੇਠ ਜਮਹੂਰੀ ਕਿਸਾਨ ਸਭਾ ਪੰਜਾਬ ਦੀ ਵਿਸ਼ੇਸ਼ ਟੀਮ ਡਾਕਟਰ ਸਤਨਾਮ ਸਿੰਘ ਅਜਨਾਲਾ ਦੀ ਅਗਵਾਈ ’ਚ ਇੱਕ ਵਫ਼ਦ ਨੇ ਦਰਿਆ ਰਾਵੀ ਵਿੱਚ ਆਏ ਹੜ੍ਹ ਪੀੜਿਤ ਦਰਜਨਾਂ ਪਿੰਡਾਂ ਦਾ ਸਰਵੇਖਣ ਕਰਦਿਆਂ ਵੇਖਿਆ ਕਿ ਪਿੰਡਾਂ ਦੇ ਲੋਕ ਆਪਣਾ ਖਾਣ ਪੀਣ ਅਤੇ ਹੋਰ ਲੋੜੀਂਦਾ ਸਮਾਨ ਤੇ ਮਾਲ ਡੰਗਰ ਟਰੈਕਟਰ ਟਰਾਲੀਆਂ ਤੇ ਹੋਰ ਸਾਧਨਾਂ ਵਿੱਚ ਲੱਦ ਰਹੇ ਸਨ ਤਾਂ ਜੋ ਉਹ ਪਿੱਛੇ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚ ਸਕਣ। ਕੁੱਝ ਅਜਿਹੇ ਪਿੰਡ ਸਨ ਘੋਨੇਵਾਲ, ਮਾਸੀਵਾਲ, ਨਿੱਸੋਕੇ, ਸਿੰਘੋਕੇ ਆਦਿ ਪਿੰਡਾਂ ’ਚ ਕੱਲ੍ਹ ਰਾਤ ਨੂੰ ਬੇਸ਼ੁਮਾਰ ਪਾਣੀ ਆਉਣ ਨਾਲ ਆਪਣਾ ਸਮਾਨ ਅਤੇ ਮਾਲ ਡੰਗਰ ਘਰਾਂ ਵਿੱਚੋਂ ਬਾਹਰ ਨਹੀਂ ਕੱਢ ਸਕੇ। ਜਦੋਂ ਇਸ ਟੀਮ ਦੇ ਮੈਂਬਰ ਸਾਬਕਾ ਸਰਪੰਚ ਹਰਦਿਆਲ ਸਿੰਘ ਡਿਆਲ ਭੱਟੀ, ਗਾਇਕ ਗੁਰਪਾਲ ਗਿੱਲ ਸੈਦਪੁਰ, ਪ੍ਰੋ. ਮਾਲਕ ਸਿੰਘ ਗੁਰਾਲਾ, ਕਿਸਾਨ ਆਗੂ ਬਲਵਿੰਦਰ ਸਿੰਘ ਰਮਦਾਸ ਚੌਂਕ ਵਿੱਚ ਪਹੁੰਚੇ ਜਿੱਥੇ ਹੜ੍ਹ ਦਾ ਪਾਣੀ ਤੇਜ਼ੀ ਨਾਲ ਵੱਧ ਰਿਹਾ ਸੀ ਜਿੱਥੇ ਰਮਦਾਸ ਡੇਰਾ ਬਾਬਾ ਨਾਨਕ ਪੁਲਿਸ ਨੇ ਨਾਕਾ ਲਾ ਕੇ ਆਵਾਜਾਈ ਰੋਕੀ ਹੋਈ ਸੀ, ਡਾ. ਅਜਨਾਲਾ ਨੇ ਉੱਥੇ ਇਕੱਠੇ ਹੋਏ ਲੋਕਾਂ ਨੂੰ ਹੜ੍ਹ ਬਾਰੇ ਹੋਰ ਜਾਣਕਾਰੀ ਲੈਣ ਲਈ ਪੁੱਛਿਆ ਤਾਂ ਉਹਨਾਂ ਸਾਰਿਆਂ ਨੇ ਕਿਹਾ ਕਿ ਇਹ ਹੜ੍ਹ ਦਾ ਪਾਣੀ ਪੰਜਾਬ ਅਤੇ ਕੇਂਦਰ ਸਰਕਾਰਾਂ ਵੱਲੋਂ ਯੱਕਲੱਖਤ ਤਿੰਨ ਲੱਖ ਕਿਊਸਕ ਤੋਂ ਵੱਧ ਪਾਣੀ ਥੀਨ ਡੈਮ ਤੋਂ ਛੱਡਣ ਅਤੇ ਮਾਧੋਪੁਰ ਦਾ ਗੇਟ ਟੁੱਟਣ ਕਾਰਨ ਇਹ ਹੜ੍ਹ ਦੀ ਕਰੋਪੀ ਆਈ ਹੈ। ਖੇਤੀ ਮਾਹਿਰ ਡਾ. ਅਜਨਾਲਾ ਨੇ ਅੱਗੇ ਦੱਸਿਆ ਕਿ ਅਜਿਹਾ ਕਰਨ ਦੀ ਬਜਾਏ ਮੌਸਮ ਵਿਭਾਗ ਦੀ ਜ਼ਿਆਦਾ ਬਾਰਸ਼ ਪੈਣ ਦੇ ਅਨੁਮਾਨ ਅਨੁਸਾਰ ਡੈਮ ਵਿੱਚੋਂ ਅੱਜ ਤੋਂ 20-25 ਦਿਨ ਪਹਿਲਾਂ ਹੀ ਥੋੜ੍ਹਾ ਥੋੜ੍ਹਾ ਕਰਕੇ ਪਾਣੀ ਜੇਕਰ ਛੱਡਿਆ ਜਾਂਦਾ ਤਾਂ ਹੜ੍ਹ ਬਿੱਲਕੁਲ ਨਹੀਂ ਸੀ ਆਉਣਾ।
ਜਦੋਂ ਇਹ ਸਰਵੇਖਣ ਟੀਮ ਬੇਦੀ ਛੰਨਾ, ਗਿੱਲਾਂਵਾਲੀ, ਮਲਕਪੁਰ, ਅਤਲੇ, ਮੰਦਰਾਂ ਵਾਲਾ ਆਦਿ ਹੜ੍ਹ ਪ੍ਰਭਾਵਿਤ ਪਿੰਡਾਂ ਦੇ ਆਮ ਲੋਕਾਂ ਨਾਲ ਗੱਲਬਾਤ ਕੀਤੀ ਜਿੰਨਾ ਦੀ ਹਜ਼ਾਰਾਂ ਏਕੜ ਫ਼ਸਲਾਂ ਇਸ ਮਨਸੂਈ (ਮਨੁੱਖ ਦੁਬਾਰਾ ਪੈਂਦਾ) ਹੜ੍ਹ ਨਾਲ ਮਾਰੀ ਗਈ ਅਤੇ ਜਾਨੀ ਮਾਲੀ ਨੁਕਸਾਨ ਵੀ ਹੋਇਆ।
ਸਰਵੇਖਣ ਟੀਮ ਸੰਯੁਕਤ ਕਿਸਾਨ ਮੋਰਚੇ ਵੱਲੋਂ ਤਹਿ ਕੀਤੀਆਂ ਮੰਗਾਂ ਕਿ ਮਾਰੀ ਗਈ ਫਸਲ ਦਾ 70 ਹਜ਼ਾਰ ਪ੍ਰਤੀ ਏਕੜ ਮੁਆਵਜ਼ਾ ਦਿੱਤਾ ਜਾਵੇ ਅਤੇ ਹੜ੍ਹ ਨਾਲ ਪੇਂਡੂ ਮਜ਼ਦੂਰਾਂ ਨੂੰ ਰੁਜ਼ਗਾਰ ਨਾ ਮਿਲਣ ਕਾਰਨ ਉਹਨਾਂ ਨੂੰ 7 ਹਜ਼ਾਰ ਰੁਪਏ ਮੁਆਵਜ਼ਾ ਦਿੱਤਾ ਜਾਵੇ, ਇਸ ਤਰ੍ਹਾਂ ਦੁੱਧਾਰੂ ਡੰਗਰਾਂ ਦੇ ਮਰ ਜਾਣ ਕਾਰਨ ਡੇੜ ਲੱਖ ਰੁਪਏ ਮੁਆਵਜ਼ਾ ਮਾਲਕ ਨੂੰ ਦਿੱਤਾ ਜਾਵੇ ਅਤੇ ਮਕਾਨਾਂ ਦੇ ਹੋਏ ਨੁਕਸਾਨ ਦੀ ਪੂਰੀ ਪੂਰੀ ਭਰਪਾਈ ਕੀਤੀ ਜਾਵੇ।
ਸੰਯੁਕਤ ਕਿਸਾਨ ਮੋਰਚੇ ਦੇ ਪ੍ਰਮੁੱਖ ਆਗੂ ਡਾ. ਸਤਨਾਮ ਸਿੰਘ ਅਜਨਾਲਾ ਨੇ ਪੱਤਰਕਾਰਾਂ ਨੂੰ ਵਿਸ਼ੇਸ਼ ਜਾਣਕਾਰੀ ਦਿੱਤੀ ਕਿ ਜਮਹੂਰੀ ਕਿਸਾਨ ਸਭਾ ਪੰਜਾਬ ਲੰਮੇ ਸਮੇਂ ਤੋਂ ਮੰਗ ਕਰਦੀ ਆ ਰਹੀ ਹੈ ਕਿ ਪੰਜਾਬ ਵਿੱਚ ਹੜ੍ਹ ਨੂੰ ਪੱਕੇ ਤੌਰ ’ਤੇ ਰੋਕਣ ਲਈ ਦਰਿਆਵਾਂ ਦਾ ਨਹਿਰੀ ਕਰਨ ਕੀਤਾ ਜਾਵੇ ਅਜਿਹਾ ਕਰਨ ਨਾਲ ਜਿਥੇ ਹਰ ਸਾਲ ਲੱਖਾਂ ਏਕੜ ਫ਼ਸਲਾਂ ਨੂੰ ਤਬਾਹ ਹੋਣ ਤੋਂ ਰੋਕਿਆ ਜਾਵੇਗਾ ਉੱਥੇ ਹਰੇਕ ਘਰ ਨੂੰ ਲੋੜੀਂਦਾ ਸਵੱਛ ਪਾਣੀ ਪੀਣ ਨੂੰ ਮਿਲੇਗਾ ਅਤੇ ਹਰੇਕ ਖੇਤ ਨੂੰ ਨਹਿਰੀ ਪਾਣੀ ਪ੍ਰਾਪਤ ਵੀ ਹੋਵੇਗਾ। ਅਜਿਹਾ ਹੋਣ ਨਾਲ 2 ਸਾਲਾਂ ਵਿੱਚ ਪੰਜਾਬ ਦੇ ਧਰਤੀ ਹੇਠਲੇ ਪਾਣੀ ਦਾ ਪੱਧਰ 1960ਵਿਆਂ ਦਹਾਕੇ ਦੇ ਪੱਧਰ ’ਤੇ ਆ ਜਾਵੇਗਾ ਅਤੇ ਪੰਜਾਬ ਦੀ ਆਰਥਿਕ ਹਾਲਤ ਬੇਹਤਰ ਹੋਵੇਗੀ ਅਤੇ ਲੱਖਾਂ ਨੌਜਵਾਨ ਨੂੰ ਰੁਜ਼ਗਾਰ ਮਿਲੇਗਾ।
ਇਸ ਸਮੇਂ ਹੋਰਨਾਂ ਤੋਂ ਇਲਾਵਾ ਪਿੰਡ ਬੇਦੀ ਛੰਨਾ ਗੁਰਪ੍ਰੀਤ ਸਿੰਘ, ਛਿੰਦਾ ਸਿੰਘ, ਰਾਜਬੀਰ ਸਿੰਘ ਤੇ ਗੁਰਮੁੱਖ ਸਿੰਘ, ਡੁਜੋਵਾਲ ਦੇ ਜਸਪਾਲ ਸਿੰਘ ਤੇ ਜੱਗਪ੍ਰੀਤ ਸਿੰਘ, ਮਲਕਪੁਰ ਦੇ ਰੇਸ਼ਮ ਸਿੰਘ, ਗਿੱਲਾਵਾਲੀ ਤੇ ਅਤਲੇ ਪਿੰਡਾਂ ਦੇ ਅੰਤਰਪ੍ਰੀਤ ਸਿੰਘ, ਕੰਵਰਜੋਤ ਸਿੰਘ, ਸਤਨਾਮ ਸਿੰਘ, ਹਰਮਨਪ੍ਰੀਤ ਸਿੰਘ, ਰਮਦਾਸ ਕਸਬੇ ਦੇ ਦਲਬੀਰ ਸਿੰਘ, ਜਗਜੀਤ ਸਿੰਘ, ਯੋਧਾ ਸਿੰਘ, ਲਾਡੀ ਸਿੰਘ, ਬਾਟੀ ਸਿੰਘ ਆਦਿ ਨੇ ਇਸ ਟੀਮ ਨੂੰ ਦੱਸਿਆ ਕਿ ਕੋਈ ਸਰਕਾਰੀ ਅਧਿਕਾਰੀ ਆਏ ਹੜ੍ਹ ਸਮੇਂ ਸਾਰ ਲੈਣ ਲਈ ਨਹੀਂ ਆਇਆ।
No comments:
Post a Comment