ਸ਼ਰਧਾਂਜਲੀਆਂ (ਸੰਗਰਾਮੀ ਲਹਿਰ-ਦਸੰਬਰ 2017)

ਇੱਕ ਮਿਸਾਲੀ ਕਮਿਊਨਿਸਟ ਸਨ ਕਾਮਰੇਡ ਸਾਧੂ ਰਾਮ ਪਾਹਲੇਵਾਲ 

ਪੰਜਾਬੀ ਦੇ ਮਸ਼ਹੂਰ ਸ਼ਾਇਰ ਪ੍ਰੋਫੈਸਰ ਮੋਹਨ ਸਿੰਘ ਨੇ ਲਿਖਿਆ ਸੀ, ''ਦੋ ਟੋਟਿਆਂ 'ਚ ਭੋਇੰ ਵੰਡੀ ਇੱਕ ਲੋਕਾਂ ਦਾ ਇੱਕ ਜੋਕਾਂ ਦਾ।'' ਲੋਕਾਂ ਨੂੰ ਜੋਕਾਂ ਤੋਂ ਮੁਕਤ ਕਰਨ ਲਈ ਸੰਘਰਸ਼ ਚਿਰਾਂ ਤੋਂ ਚੱਲਿਆ ਆ ਰਿਹਾ ਹੈ। ਇਸ ਸੰਘਰਸ਼ ਦੀ ਰਫਤਾਰ ਕਦੇ ਮੱਠੀ, ਕਦੇ ਤੇਜ਼ ਹੁੰਦੀ ਰਹੀ ਹੈ, ਪਰ ਜੋਕਾਂ ਤੋਂ ਮੁਕਤੀ ਲਈ ਸੰਘਰਸ਼ ਕਰ ਰਹੇ ਕਾਫਲੇ ਨੂੰ ਇਹ ਮੁਕੰਮਲ ਭਰੋਸਾ ਹੈ ਕਿ ਇੱਕ ਦਿਨ ਲੋਕਾਂ ਨੂੰ ਜੋਕਾਂ ਤੋਂ ਮੁਕਤੀ ਜ਼ਰੂਰ ਮਿਲੇਗੀ। ਇਸ ਕਾਫਲੇ 'ਚ ਲੋਕ ਲਗਾਤਾਰ ਸ਼ਾਮਲ ਹੁੰਦੇ ਆਏ ਹਨ। ਇਹ ਰਾਹ ਕੋਈ ਏਨਾ ਸੁਖਾਲਾ ਨਹੀਂ ਕਿ ਇਸ ਦੇ ਪਾਂਧੀ ਬਿਨਾਂ ਕਿਸੇ ਰੁਕਾਵਟ ਅਡੋਲ ਤੁਰਦੇ ਜਾਣਗੇ। ਕਈ ਲੋਕ ਇਸ ਪੈਂਡੇ ਤੋਂ ਥੱਕ-ਹਾਰ ਕੇ ਅਲੱਗ ਵੀ ਹੋ ਜਾਂਦੇ ਹਨ। ਜਦੋਂਕਿ ਬਹੁਤੇ ਇਸ ਦੀ ਰਵਾਨਗੀ ਨੂੰ ਬਣਾਈ ਰੱਖਦੇ ਹਨ, ਪਰ ਅਜਿਹੇ ਲੋਕਾਂ ਦੀ ਗਿਣਤੀ ਬਹੁਤ ਘੱਟ ਹੈ, ਜਿਹੜੇ ਇਸ ਪੰਧ 'ਤੇ ਖੁਦ ਤਾਂ ਤੁਰਦੇ ਹੀ ਹਨ ਪਰ ਨਾਲ ਹੀ ਆਪਣੀ ਸੰਤਾਨ ਨੂੰ ਵੀ ਇਸੇ ਪੰਧ 'ਤੇ ਤੁਰਨ ਲਈ ਪ੍ਰੇਰਦੇ ਹਨ। ਅਜਿਹੇ ਗਿਣਤੀ ਦੇ ਲੋਕਾਂ 'ਚੋਂ ਸਨ ਕਾਮਰੇਡ ਸਾਧੂ ਰਾਮ ਪਾਹਲੇਵਾਲ।
ਦ੍ਰਿੜ੍ਹ ਨਿਸ਼ਚੇ ਵਾਲੇ ਇਸ ਕਰਮਯੋਗੀ ਮਨੁੱਖ ਦਾ ਜਨਮ 1931 ਵਿੱਚ ਇੱਕ ਗਰੀਬ ਕਿਸਾਨ ਪਰਵਾਰ 'ਚ ਮਾਤਾ ਭਗਵੰਤੀ ਦੇਵੀ ਤੇ ਪਿਤਾ ਮੁਨਸ਼ੀ ਰਾਮ ਦੇ ਘਰ ਹੋਇਆ। ਉਹ ਇੱਕ ਬਹੁਤ ਹੀ ਹੋਣਹਾਰ ਵਿਦਿਆਰਥੀ ਸਨ। ਗੜ੍ਹਸ਼ੰਕਰ ਦੇ ਸਰਕਾਰੀ ਸਕੂਲ 'ਚ ਉਨ੍ਹਾ ਦਸਵੀਂ ਦਾ ਇਮਤਿਹਾਨ ਕਲਾਸ 'ਚੋਂ ਅੱਵਲ ਰਹਿਕੇ ਪਾਸ ਕੀਤਾ ਸੀ। 1954 'ਚ ਉਹ ਇੱਕ ਚੌਥਾ ਦਰਜਾ ਮੁਲਾਜ਼ਮ ਵਜੋਂ ਰੇਲਵੇ 'ਚ ਭਰਤੀ ਹੋਏ ਸਨ। ਆਪਣੇ ਵਿਭਾਗ ਦੇ ਮੁਲਾਜ਼ਮਾਂ ਦੀਆਂ ਮੰੰਗਾਂ ਨੂੰ ਲੈ ਕੇ 1955 'ਚ ਉਨ੍ਹਾ 9 ਦਿਨ ਦੀ ਭੁੱਖ ਹੜਤਾਲ ਕੀਤੀ, ਪਰ ਇਹ ਅੰਦੋਲਨ ਸਫਲ ਨਹੀਂ ਹੋਇਆ ਤੇ ਉਨ੍ਹਾ ਨੂੰ ਨੌਕਰੀ ਤੋਂ ਹੱਥ ਧੋਣੇ ਪਏ। ਬਾਅਦ 'ਚ ਉਹ ਰੇਲਵੇ ਦੇ ਬੜੌਦਾ ਹਾਊਸ ਹੈੱਡਕੁਆਰਟਰ 'ਚ ਇੱਕ ਕਲਰਕ ਵਜੋਂ ਭਰਤੀ ਹੋਏ ਅਤੇ ਉਨ੍ਹਾ ਟਰੇਡ ਯੂਨੀਅਨ ਸਰਗਰਮੀਆਂ 'ਚ ਪੂਰੀ ਸਰਗਰਮੀ ਨਾਲ ਹਿੱਸਾ ਲੈਣਾ ਸ਼ੁਰੂ ਕਰ ਦਿੱਤਾ। ਉਨ੍ਹਾ ਨੂੰ ਇਨ੍ਹਾਂ ਸਰਗਰਮੀਆਂ ਕਾਰਨ ਜੇਲ੍ਹ ਵੀ ਹੋਈ ਤੇ ਨੌਕਰੀ ਤੋਂ ਹੱਥ ਵੀ ਧੋਣੇ ਪਏ, ਪਰ ਉਨ੍ਹਾ ਆਪਣੀ ਟਰਮੀਨੇਸ਼ਨ ਖਿਲਾਫ ਅਦਾਲਤੀ ਲੜਾਈ ਲੜੀ ਤੇ 6 ਮਹੀਨਿਆਂ ਅੰਦਰ ਉਨ੍ਹਾ ਨੂੰ ਨੌਕਰੀ 'ਤੇ ਬਹਾਲ ਕਰ ਦਿੱਤਾ ਗਿਆ। 1968 'ਚ ਰੇਲਵੇ ਦੀ ਕੁਲ ਹਿੰਦ ਹੜਤਾਲ ਦੌਰਾਨ ਉਨ੍ਹਾ ਨੂੰ ਮੁੜ ਗ੍ਰਿਫਤਾਰ ਕਰ ਲਿਆ ਗਿਆ ਤੇ ਨੌਕਰੀ ਤੋਂ ਕੱਢ ਦਿੱਤਾ ਗਿਆ, ਪਰ ਅਦਾਲਤ ਨੇ ਉਨ੍ਹਾ ਨੂੰ ਮੁੜ ਬਹਾਲ ਕਰ ਦਿੱਤਾ। 1974 ਦੀ ਰੇਲਵੇ ਹੜਤਾਲ ਤੋਂ ਪਹਿਲਾਂ ਕੇਂਦਰ ਸਰਕਾਰ ਨੇ ਰੇਲਵੇ ਦੇ ਸਰਗਰਮ ਆਗੂਆਂ ਨੂੰ ਸਜ਼ਾ ਵਜੋਂ ਦੂਰ-ਦੁਰਾਡੇ ਬਦਲ ਦਿੱਤਾ। ਕਾਮਰੇਡ ਸਾਧੂ ਰਾਮ ਨੂੰ ਵੀ ਨਵੀਂ ਦਿੱਲੀ ਤੋਂ ਬਦਲ ਕੇ ਅੰਮ੍ਰਿਤਸਰ ਭੇਜ ਦਿੱਤਾ ਗਿਆ, ਪਰ ਉਹ ਉਥੇ ਜਾ ਕੇ ਵੀ ਹੜਤਾਲ 'ਚ ਸ਼ਾਮਲ ਹੋਏ।
ਇਹ ਵੀ ਇੱਕ ਦਿਲਚਸਪ ਪਹਿਲੂ ਹੈ ਕਿ ਕਾਮਰੇਡ ਸਾਧੂ ਰਾਮ ਪਾਹਲੇਵਾਲ ਨੇ ਆਪਣੇ ਸਿਆਸੀ ਜੀਵਨ ਦੀ ਸ਼ੁਰੂਆਤ ਆਰ ਐੱਸ ਐੱਸ ਦੇ ਇੱਕ ਵਰਕਰ ਵਜੋਂ ਕੀਤੀ ਸੀ, ਪਰ ਬਾਅਦ 'ਚ ਅਮਲ 'ਚ ਜਦ ਉਨ੍ਹਾ ਆਮ ਲੋਕਾਂ 'ਚ ਵੰਡੀਆਂ ਪਾਉਣ ਵਾਲੀਆਂ ਆਰ ਐੱਸ ਐੱਸ ਦੀਆਂ ਗਤੀਵਿਧੀਆਂ ਨੂੰ ਸਮਝਿਆ ਤੇ ਹੌਲੀ-ਹੌਲੀ ਉਨ੍ਹਾ ਮੋੜਾ ਕੱਟਣਾ ਸ਼ੁਰੂ ਕਰ ਦਿੱਤਾ ਤੇ 1968 'ਚ ਉਹ ਸੀ ਪੀ ਆਈ ਐੱਮ 'ਚ ਸ਼ਾਮਲ ਹੋ ਗਏ ਅਤੇ ਰੇਲਵੇ ਦੇ ਟਰੇਡ ਯੂਨੀਅਨ ਮੋਰਚੇ 'ਤੇ ਉਨ੍ਹਾ ਪੂਰੀ ਸਰਗਰਮੀ ਨਾਲ ਕੰਮ ਕੀਤਾ। ਆਪਣੀ ਸੇਵਾ-ਮੁਕਤੀ ਤੋਂ ਬਾਅਦ ਉਹ ਪਾਰਟੀ 'ਚ ਪੂਰੀ ਤਰ੍ਹਾਂ ਸਰਗਰਮ ਹੋ ਗਏ ਤੇ ਗੜ੍ਹਸ਼ੰਕਰ ਤਹਿਸੀਲ ਦੇ ਪਾਰਟੀ ਦਫਤਰ ਦੇ ਉਹ ਦਫਤਰ ਸਕੱਤਰ ਰਹੇ। 2001 'ਚ ਉਨ੍ਹਾ ਸੀ ਪੀ ਐੱਮ ਪੰਜਾਬ ਦੀ ਸਥਾਪਨਾ 'ਚ ਵੀ ਮੋਹਰੀ ਰੋਲ ਨਿਭਾਇਆ। ਜਥੇਬੰਦਕ ਸਰਗਰਮੀਆਂ ਦੇ ਮਾਹਰ ਕਾਮਰੇਡ ਸਾਧੂ ਰਾਮ ਪਾਹਲੇਵਾਲ ਨੇ ਹਮੇਸ਼ਾ ਆਪਣੇ ਨਿੱਜੀ ਕੰਮਾਂ ਦੀ ਥਾਂ ਪਾਰਟੀ ਦੇ ਕਾਰਜਾਂ ਨੂੰ ਤਰਜੀਹ ਦਿੱਤੀ। ਉਹ ਪੂਰੀ ਤਰ੍ਹਾਂ ਮਾਰਕਸਵਾਦੀ ਵਿਚਾਰਧਾਰਾ ਨੂੰ ਸਮਰਪਤ ਰਹੇ ਤੇ ਇਸ 'ਚ ਕੋਈ ਵੀ ਥਿੜਕਣ ਨਹੀਂ ਦਿਖਾਈ। ਇੱਕ ਮਿਸਾਲੀ ਕਮਿਊਨਿਸਟ ਹੋਣ ਦਾ ਸਬੂਤ ਦਿੰਦਿਆਂ ਉਨ੍ਹਾ ਆਪਣੇ ਵੱਡੇ ਬੇਟੇ ਕਾਮਰੇਡ ਰਵੀ ਕੰਵਰ ਨੂੰ ਪਾਰਟੀ ਦਾ ਕੁਲਵਕਤੀ ਬਣਨ ਲਈ ਪ੍ਰੇਰਿਆ। ਇਸੇ ਪ੍ਰੇਰਨਾ ਸਦਕਾ ਕਾਮਰੇਡ ਰਵੀ ਕੰਵਰ ਅੱਜ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ (ਆਰ ਐੱਮ ਪੀ ਆਈ) ਦੇ ਕੁਲਵਕਤੀ ਵਜੋਂ ਕੰਮ ਕਰ ਰਿਹਾ ਹੈ ਤੇ ਪਾਰਟੀ ਦੇ ਸੂਬਾਈ ਦਫਤਰ ਸਕੱਤਰ ਵਜੋਂ ਸੇਵਾ ਕਰ ਰਿਹਾ ਹੈ। ਉਨ੍ਹਾ ਦਾ ਛੋਟਾ ਬੇਟਾ ਪਹਿਲਾਂ ਵਿਦਿਆਰਥੀ ਜਥੇਬੰਦੀ ਐੱਸ ਐੱਫ ਆਈ 'ਚ ਸਰਗਰਮ ਰਿਹਾ ਤੇ ਬਾਅਦ 'ਚ ਰੇਲਵੇ 'ਚ ਭਰਤੀ ਹੋਣ ਤੋਂ ਬਾਅਦ ਰੇਲਵੇ ਟਰੇਡ ਯੂਨੀਅਨ 'ਚ ਸਰਗਰਮ ਰਿਹਾ।
ਕਾਮਰੇਡ ਸਾਧੂ ਰਾਮ 6 ਅਕਤੂਬਰ ਦੀ ਸ਼ਾਮ ਨੂੰ ਤਾਂ ਭਾਵੇਂ ਸਦੀਵੀ ਵਿਛੋੜਾ ਦੇ ਗਏ ਹਨ, ਪਰ ਉਨ੍ਹਾ ਦੀਆਂ ਭਾਈ ਲਾਲੋਆਂ ਦੇ ਹਿੱਤਾਂ ਦੀ ਰਾਖੀ ਕਰਨ ਲਈ ਪਾਈਆਂ ਗਈਆਂ ਪੈੜਾਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਹਮੇਸ਼ਾ ਪ੍ਰੇਰਨਾ ਦਾ ਸਰੋਤ ਬਣੀਆਂ ਰਹਿਣਗੀਆਂ।
ਮਨੁੱਖਤਾ ਦੀ ਭਲਾਈ ਲਈ ਹਮੇਸ਼ਾ ਸਰਗਰਮ ਰਹੇ ਕਾਮਰੇਡ ਸਾਧੂ ਰਾਮ ਪਾਹਲੇਵਾਲ ਨੇ ਮੌਤ ਤੋਂ ਬਾਅਦ ਆਪਣੀ ਦੇਹ ਮੈਡੀਕਲ ਖੋਜ ਕਾਰਜਾਂ ਲਈ ਡੀ ਐੱਮ ਸੀ ਲੁਧਿਆਣਾ ਦੇ ਹਸਪਤਾਲ ਨੂੰ ਦਾਨ ਕਰ ਦਿੱਤੀ ਸੀ ਤੇ ਉਨ੍ਹਾ ਦੀ ਇਸ ਇੱਛਾ 'ਤੇ ਉਨ੍ਹਾ ਦੇ ਪਰਵਾਰ ਨੇ ਪੂਰੀ ਸੁਹਿਰਦਤਾ ਨਾਲ ਫੁੱਲ ਚੜ੍ਹਾਏ। ਪਿੰਡ ਪਾਹਲੇਵਾਲ, ਜੋ ਕਿ ਗੜ੍ਹਸ਼ੰਕਰ-ਨੰਗਲ ਡੈਮ ਰੋਡ 'ਤੇ ਸਥਿਤ ਹੈ, ਵਿਖੇ 16 ਨਵੰਬਰ ਨੂੰ ਕਾਮਰੇਡ ਸਾਧੂ ਰਾਮ ਪਾਹਲੇਵਾਲ ਨੂੰ ਸ਼ਰਧਾ ਦੇ ਫੁੱਲ ਭੇਟ ਕਰਨ ਲਈ ਉਨ੍ਹਾ ਦੇ ਯੁੱਧ ਸਾਥੀ ਤੇ ਆਰ.ਐਮ.ਪੀ.ਆਈ. ਦੇ ਆਗੂ ਇਕੱਠੇ ਹੋਏ ਅਤੇ ਉਨ੍ਹਾਂ ਨੂੰ ਸੰਗਰਾਮੀ ਸ਼ਰਧਾਂਜਲੀਆਂ ਭੇਂਟ ਕੀਤੀਆਂ ਗਈਆਂ।
- ਇੰਦਰਜੀਤ ਚੁਗਾਵਾਂ



ਪਰਿਵਾਰਕ ਮੈਂਬਰਾਂ ਦੇ ਸਦੀਵੀਂ ਵਿਛੋੜੇ 'ਤੇ ਸੰਵੇਦਨਾਵਾਂ 

ਆਰ.ਐਮ.ਪੀ.ਆਈ. ਦੇ ਸੂਬਾਈ ਸਕੱਤਰੇਤ ਦੇ ਮੈਂਬਰ ਸਾਥੀ ਰਵੀ ਕੰਵਰ ਦੇ ਛੋਟੇ ਭਰਾ ਸਾਥੀ ਰਾਕੇਸ਼ਵਰ ਸਿੰਘ 2 ਦਸੰਬਰ ਨੂੰ ਸਦੀਵੀਂ ਵਿਛੋੜਾ ਦੇ ਗਏ ਹਨ। ਸਾਥੀ ਰਵੀ ਕੰਵਰ ਦੇ ਪਰਵਾਰ ਨੂੰ ਇਹ ਦੂਜੀ ਵੱਡੀ ਸੱਟ ਵੱਜੀ ਹੈ। ਇਸ ਤੋਂ ਪਹਿਲਾਂ ਉਨ੍ਹਾਂ ਦੇ ਪਿਤਾ ਜੀ, ਮਿਸਾਲੀ ਕਮਿਉੂਨਿਸਟ ਤੇ ਟਰੇਡ ਯੁੂਨੀਅਨ ਆਗੂ, ਸਾਥੀ ਸਾਧੂ ਰਾਮ (ਬਾਊ ਜੀ), ਸਦੀਵੀਂ ਵਿਛੋੜਾ ਦੇ ਗਏ ਸਨ। ਸਾਥੀ ਰਾਕੇਸ਼ਵਰ, ਜੋ 'ਪੇਂਡੂ' ਦੇ ਨਿੱਕ ਨਾਮ ਨਾਲ ਵਧੇਰੇ ਜਾਣੇ ਜਾਂਦੇ ਸਨ, ਵੀ ਆਪਣੇ ਵਿਦਿਆਰਥੀ ਜੀਵਨ ਦੌਰਾਨ ਜੁਝਾਰੂ ਵਿਦਿਆਰਥੀ ਆਗੂ ਵਜੋਂ ਪਛਾਣ ਸਥਾਪਤ ਕਰ ਚੁੱਕੇ ਸਨ। ਉਹ ਸਾਰੀ ਉਮਰ ਪਾਰਟੀ ਦੇ ਅੰਗ-ਸੰਗ ਰਹੇ। ਇਸ ਨੂੰ ਇੱਕ ਦੁਖਦ ਮੌਕਾ ਮੇਲ ਹੀ ਕਿਹਾ ਜਾਵੇਗਾ ਕਿ ਹਾਲੇ 28 ਨਵੰਬਰ ਨੂੰ ਉਨ੍ਹਾਂ ਦੀ ਹੋਣਹਾਰ ਬੇਟੀ ਦੀ ਸ਼ਾਦੀ ਹੋਈ ਸੀ 'ਤੇ 2 ਦਸੰਬਰ ਨੂੰ ਇਹ ਦੁਰਘਟਨਾ ਵਾਪਰ ਗਈ।
 

ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ ਦੀ ਸੰਗਰੂਰ ਜ਼ਿਲ੍ਹਾਂ  ਕਮੇਟੀ ਦੇ ਮੈਂਬਰ ਅਤੇ ਮੂਣਕ-ਲਹਿਰਾ ਤਹਿਸੀਲ ਇਕਾਈ ਦੇ ਸਕੱਤਰ ਸਾਥੀ ਕਰਨੈਲ ਸਿੰਘ ਗੁਰਨੇ ਕਲਾਂ ਬੀਤੇ ਦਿਨੀਂ ਜਿਗਰ ਦੀ ਬਿਮਾਰੀ ਕਰਕੇ ਸਦਾ ਲਈ ਵਿਛੜ ਗਏ। ਉਨ੍ਹਾਂ ਨੱਮਿਤ ਸ਼ਰਧਾਂਜਲੀ ਸਮਾਗਮ 30 ਨਵੰਬਰ, 17 ਨੂੰ ਹੋਇਆ। ਆਰ.ਐਮ.ਪੀ.ਆਈ. ਦੇ ਸੂਬਾ ਕਮੇਟੀ ਮੈਂਬਰ ਸਾਥੀ ਛੱਜੂ ਰਾਮ ਰਿਸ਼ੀ, ਜਮਹੂਰੀ ਅਧਿਕਾਰ ਸਭਾ ਦੇ ਜ਼ਿਲ੍ਹਾ ਪ੍ਰਧਾਨ ਨਾਮਦੇਵ ਭੂਟਾਲ, ਜਗਜੀਤ ਭੁਟਾਲ, ਹਰੀ ਸਿੰਘ ਕੋਟੜਾ ਅਤੇ ਹੋਰਨਾਂ ਨੇ ਉਨ੍ਹਾਂ ਦੀਆਂ ਬੇਮਿਸਾਲ ਸੇਵਾਵਾਂ ਨੂੰ ਯਾਦ ਕਰਦਿਆਂ ਸ਼ਰਧਾਂਜਲੀਆਂ ਭੇਟ ਕੀਤੀਆਂ। ਸਾਥੀ ਭੀਮ ਸਿੰਘ ਆਲਮਪੁਰ ਵੱਲੋਂ ਸਭਨਾਂ ਦਾ ਆਭਾਰ ਪਰਗਟ ਕੀਤਾ ਗਿਆ।
 

ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ ਦੇ ਸੂਬਾਈ ਸਕੱਤਰੇਤ ਦੇ ਮੈਂਬਰ ਸਾਥੀ ਪਰਗਟ ਸਿੰਘ ਜਾਮਾਰਾਏ ਦੇ ਮਾਤਾ ਜੀ, ਸ਼੍ਰੀਮਤੀ ਦਲਬੀਰ ਕੌਰ (80) ਸੁਪਤਨੀ ਸ੍ਰੀ ਧਰਮ ਸਿੰਘ 28 ਅਕਤੂਬਰ, 17 ਨੂੰ ਸਦੀਵੀਂ ਵਿਛੋੜਾ ਦੇ ਗਏ। ਉਨ੍ਹਾਂ ਨਮਿਤ ਸ਼ੋਕ ਸਭਾ 6 ਨਵੰਬਰ ਨੂੰ ਹੋਈ ਜਿੱਥੇ ਪਾਰਟੀ ਦੇ ਜਨਰਲ ਸਕੱਰਤ ਸਾਥੀ ਮੰਗਤ ਰਾਮ ਪਾਸਲਾ ਤੇ ਹੋਰਨਾਂ ਪਾਰਟੀ ਅਤੇ ਜਮਹੂਰੀ ਲਹਿਰ ਦੇ ਆਗੂਆਂ ਵਲੋਂ ਮਾਤਾ ਜੀ ਦੇ ਲੋਕ ਲਹਿਰ 'ਚ ਪਾਏ ਯੋਗਦਾਨ ਨੂੰ ਯਾਦ ਕਰਦਿਆਂ ਸ਼ਰਧਾਂਜਲੀਆਂ ਭੇਂਟ ਕੀਤੀਆਂ ਗਈਆਂ।
 

ਜਨਵਾਦੀ ਇਸਤਰੀ ਸਭਾ ਪੰਜਾਬ ਦੀ ਜਨਰਲ ਸਕੱਤਰ ਅਤੇ ਸੂਬਾ ਕਮੇਟੀ ਮੈਂਬਰ ਆਰ.ਐਮ.ਪੀ.ਆਈ. ਦੇ ਪਿਤਾ ਜੀ. ਸ੍ਰੀ ਰਤਨ ਸਿੰਘ (82) 23 ਅਕਤੂਬਰ, 2017 ਨੂੰ ਸਦੀਵੀ ਵਿਛੋੜਾ ਦੇ ਗਏ। 8 ਨਵੰਬਰ ਨੂੰ ਉਨ੍ਹਾਂ ਦੀ ਅੰਤਮ ਅਰਦਾਸ 'ਚ ਬੋਲਦਿਆਂ ਸਾਥੀ ਮੰਗਤ ਰਾਮ ਪਾਸਲਾ ਅਤੇ ਹੋਰਨਾਂ ਪਾਰਟੀ ਆਗੂਆਂ ਵਲੋਂ ਘੁਮਾਣ ਪ੍ਰੀਵਾਰ ਨਾਲ ਦੁੱਖ ਵੰਡਾ ਉਂਦਿਆਂ ਵਿਛੜੇ ਬਜ਼ੁਰਗ ਨੂੰ ਸ਼ਰਧਾਂ ਦੇ ਫੁੱਲ ਭੇਂਟ ਕੀਤੇ ਗਏ।
ਆਰ.ਐਮ.ਪੀ.ਆਈ ਅਤੇ ਅਦਾਰਾ 'ਸੰਗਰਾਮੀ ਲਹਿਰ' ਉਪਰੋਕਤ ਸਾਰੇ ਸਾਥੀਆਂ ਦੇ ਦੁੱਖ 'ਚ ਸ਼ਾਮਲ ਹੁੰਦੇ ਹੋਏ ਸਭਨਾ ਵਿਛੋੜਾ ਦੇ ਗਿਆਂ ਨੂੰ ਸ਼ਰਧਾਂਜਲੀਆਂ ਭੇਟ ਕਰਦੇ ਹਨ।



ਕਾਮਰੇਡ ਟਪਿਆਲਾ ਤੇ ਸਾਥੀਆਂ ਨੂੰ ਬਰਸੀ ਮੌਕੇ ਸ਼ਰਧਾਂਜਲੀਆਂ 

ਉਘੇ ਦੇਸ਼ ਭਗਤ, ਮਹਾਨ ਇਨਕਲਾਬੀ ਯੋਧੇ ਕਾਮਰੇਡ ਦਲੀਪ ਸਿੰਘ ਟਪਿਆਲਾ ਦੀ 25ਵੀ ਬਰਸੀ ਮੋਕੇ ਇਕ ਵਿਸ਼ਾਲ ਕਾਨਫਰੰਸ ਜਮਹੂਰੀ ਕਿਸਾਨ ਸਭਾ ਪੰਜਾਬ ਦੇ ਸੂਬਾ ਪ੍ਰਧਾਨ ਡਾ:ਸਤਨਾਮ ਸਿੰਘ ਅਜਨਾਲਾ ਦੀ ਅਗਵਾਈ ਹੇਠ ਹੋਈ ਜਿਸ ਵਿਚ ਪੁੱਜੇ ਆਗੂਆਂ ਨੇ ਟਪਿਆਲਾ ਜੀ ਅਤੇ ਉਨ੍ਹਾਂ ਦੇ ਸਾਥੀਆਂ ਨੂੰ ਸ਼ਰਧਾਜਲੀਆਂ ਭੇਂਟ ਕੀਤੀਆਂ। ਕਾਨਫਰੰਸ ਨੂੰ ਸੰਬੋਧਨ ਕਰਦਿਆ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ ਦੇ ਜਨਰਲ ਸਕੱਤਰ ਕਾਮਰੇਡ ਮੰਗਤ ਰਾਮ ਪਾਸਲਾ ਨੇ ਕਿਹਾ ਕਿ ਪਹਿਲਾਂ 10 ਸਾਲ ਮਨਮੋਹਨ ਸਿੰਘ ਦੀ ਅਗਵਾਈ ਵਾਲੀ ਕਾਂਗਰਸ ਸਰਕਾਰ ਅਤੇ ਹੁਣ ਭਾਜਪਾ ਦੀ ਮੋਦੀ ਸਰਕਾਰ ਨੇ ਭਾਰਤ ਨੂੰ ਪੂਰੀ ਤਰ੍ਹਾਂ ਸਾਮਰਾਜੀ ਤਾਕਤਾਂ ਅੱਗੇ ਵੇਚ ਦਿੱਤਾ ਹੈ। ਅੱਜ ਭਾਰਤ ਅੰਦਰ ਅੱਧੇ ਤੋ ਵੱਧ ਜਨਸੰਖਿਆਂ ਗਰੀਬੀ ਦੀ ਰੇਖਾ ਤੋ ਹੇਠਾਂ ਜੀਅ ਰਹੀ ਹੈ, ਸਾਰੇ ਸੂਬਿਆਂ ਵਿਚ ਲੁੱਟ -ਖੋਹ, ਕਾਤਲੋਗਾਰਦ, ਬਲਾਤਕਾਰ ਦੀਆਂ ਘਟਨਾਵਾਂ ਹੋ ਰਹੀਆਂ ਹਨ, ਦੇਸ਼ ਦਾ ਕਿਸਾਨ ਖੁਦਕਸ਼ੀਆਂ ਕਰ ਰਿਹਾ ਹੈ ਪਰ ਮੋਦੀ ਸਾਹਿਬ ਵਿਦੇਸ ਦੀ ਯਾਤਰਾ ਕਰਕੇ ਭਾਰਤ ਨੂੰ ਗਹਿਣੇ ਰੱਖਣ ਲਈ ਸਮਝੌਤਾ ਦਰ ਸਮਝੌਤਾ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਅੰਦਰ ਕੈਪਟਨ ਦੀ ਸਰਕਾਰ ਝੂਠ ਦੇ ਸਹਾਰੇ ਸੱਤਾ ਵਿਚ ਆਈ ਹੈ ਅਤੇ ਅੱਜ ਵੋਟਾਂ ਦੌਰਾਨ ਕੀਤੇ ਪ੍ਰਮੁੱਖ ਵਾਅਦੇ ਵੀ ਹਵਾ ਹੋ ਗਏ ਹਨ। ਲੋਕ 8 ਮਹੀਨਿਆਂ ਵਿਚ ਹੀ ਇਸ ਸਰਕਾਰ ਤੋ ਬੇਚੈਨ ਹੋ ਗਏ ਹਨ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਵਧੀਆ ਅਤੇ ਖੁਸ਼ਹਾਲ ਭਾਰਤ ਬਣਾਉਣ ਲਈ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ ਦਾ ਸਾਥ ਦੇਣ। ਹੋਰਨਾਂ ਤੋ ਇਲਾਵਾ ਸਾਥੀ ਰਘਬੀਰ ਸਿੰਘ ਪਕੀਵਾਂ, ਰਤਨ ਸਿੰਘ ਰੰਧਾਵਾ, ਅਮਰੀਕ ਸਿੰਘ ਦਾਊਦ, ਗੁਰਨਾਮ ਸਿੰਘ ਉਮਰਪੁਰਾ, ਜਨਵਾਦੀ ਇਸਤਰੀ ਸਭਾ ਦੀ ਸੂਬਾ ਜਨਰਲ ਸਕੱਤਰ ਬੀਬੀ ਨੀਲਮ ਘੁਮਾਣ, ਵਿਰਸਾ ਸਿੰਘ ਟਪਿਆਲਾ, ਕੁਲਵੰਤ ਸਿੰਘ ਮਲੂਨੰਗਲ, ਰਾਜਬੀਰ ਸਿੰਘ ਗਿੱਲ, ਘਰ ਬਚਾਉ ਕਮੇਟੀ ਦੇ ਚੇਅਰਮੈਨ ਅਜਾਇਬ ਸਿੰਘ, ਅਮਰਜੀਤ ਸਿੰਘ ਭੀਲੋਵਾਲ, ਸ਼ੀਤਲ ਸਿੰਘ ਤਲਵੰਡੀ, ਬੀਬੀ ਸਰਬਜੀਤ ਕੋਰ ਜਸਰਾਉਰ, ਮਾਸਟਰ ਹਰਭਜਨ ਸਿੰਘ, ਬਲਵਿੰਦਰ ਸਿੰਘ ਰਵਾਲ ਆਦਿ ਨੇ ਟਪਿਆਲਾ ਨੂੰ ਸ਼ਰਧਾਜਲੀਆਂ ਭੇਂਟ ਕਰਦਿਆਂ ਮੋਦੀ ਅਤੇ ਪੰਜਾਬ ਦੀ ਕੈਪਟਨ ਸਰਕਾਰ ਦੀਆਂ ਨੀਤੀਆਂ ਵਿਰੁੱਧ ਮੈਦਾਨਾਂ 'ਚ ਨਿੱਤਰਣ ਦਾ ਸੱਦਾ ਦਿੱਤਾ।