ਸੰਪਾਦਕੀ: ਪੰਜਾਬ ਅਸੰਬਲੀ ਚੋਣਾਂ ਅਤੇ ਖੱਬੀਆਂ ਤੇ ਜਮਹੂਰੀ ਸ਼ਕਤੀਆਂ ਦੇ ਏਕੇ ਦੀ ਮਹੱਤਤਾ

ਪੰਜਾਬ ਵਿਚ 2017 ਅੰਦਰ ਹੋਣ ਵਾਲੀਆਂ ਅਸੈਂਬਲੀ ਚੋਣਾਂ ਉਂਝ ਤਾਂ ਸਮੁੱਚੇ ਦੇਸ਼ ਲਈ, ਪ੍ਰੰਤੂ ਪੰਜਾਬ ਲਈ ਵਿਸ਼ੇਸ਼ ਮਹੱਤਤਾ ਰੱਖਦੀਆਂ ਹਨ। ਬੀ.ਜੇ.ਪੀ. ਦੀ ਅਗਵਾਈ ਵਾਲੀ ਕੇਂਦਰੀ ਸਰਕਾਰ, ਜੋ ਪੰਜਾਬ ਵਿਚ ਅਕਾਲੀ ਦਲ ਦੀ ਭਾਈਵਾਲ ਹੈ, ਆਰਥਿਕ ਤੌਰ 'ਤੇ ਦੇਸ਼ ਨੂੰ ਗੁਲਾਮ ਬਣਾਉਣ ਦੇ ਰਾਹ ਤੁਰੀ ਹੋਈ ਹੈ। ਭਾਰਤ ਦੀ ਸਾਮਰਾਜ ਨਾਲ ਅਜੋਕੀ ਯੁਧਨੀਤਕ ਸਾਂਝ ਆਜ਼ਾਦੀ ਤੋਂ ਬਾਅਦ ਸ਼ਾਇਦ ਦੇਸ਼ ਨਾਲ ਸਭ ਤੋਂ ਵੱਡੀ ਧੋਖੇਬਾਜ਼ੀ ਹੈ। ਸੰਘ ਪਰਿਵਾਰ, ਦੇਸ਼ ਨੂੰ 'ਹਿੰਦੂ ਰਾਸ਼ਟਰ' ਬਣਾਉਣ ਦੇ ਇਰਾਦੇ ਨਾਲ ਘੱਟ ਗਿਣਤੀਆਂ ਵਿਰੁੱਧ ਨਫਰਤ ਭਰਿਆ ਅੱਤ ਦਾ ਫਿਰਕੂ ਪ੍ਰਚਾਰ ਹੀ ਨਹੀਂ ਕਰ ਰਿਹਾ ਸਗੋਂ ਉਨ੍ਹਾਂ ਉਪਰ ਸਰੀਰਕ ਹਮਲੇ ਕਰਨ ਦੀਆਂ ਵੀ ਸਾਰੀਆਂ ਸੀਮਾਵਾਂ ਪਾਰ ਕਰ ਰਿਹਾ ਹੈ। ਪੰਜਾਬ ਅੰਦਰ ਅਕਾਲੀ ਦਲ-ਭਾਜਪਾ ਹਕੂਮਤ ਨੇ ਪਿਛਲੇ ਦਸਾਂ ਸਾਲਾਂ ਵਿਚ ਅੰਨ੍ਹੀ ਲੁੱਟ ਮਚਾਈ ਹੈ। ਸਰਕਾਰ ਦੀ ਸਰਪ੍ਰਸਤੀ ਹੇਠ ਭੌਂ ਮਾਫੀਆ, ਰੇਤਾ ਮਾਫੀਆ, ਸ਼ਰਾਬ ਮਾਫੀਆ, ਕੇਬਲ ਮਾਫੀਆ, ਟਰਾਂਸਪੋਰਟ ਮਾਫੀਆ ਆਦਿ ਨੇ ਹਰ ਤਰ੍ਹਾਂ ਦੇ ਕੁਕਰਮ ਕਰਕੇ ਅਰਬਾਂ ਖਰਬਾਂ ਰੁਪਏ ਹੀ ਨਹੀਂ ਕਮਾਏ, ਸਗੋਂ ਗੈਂਗਸਟਰਾਂ ਦੇ ਗੈਂਗ ਖੜ੍ਹੇ ਕਰਕੇ ਸੂਬੇ ਅੰਦਰ ਪੂਰੀ ਤਰ੍ਹਾਂ ਜੰਗਲ  ਰਾਜ ਸਥਾਪਤ ਕਰ ਦਿੱਤਾ ਹੈ। ਪੂਰੀ ਅਫਸਰਸ਼ਾਹੀ ਦਾ ਸਰਕਾਰੀਕਰਨ ਕਰ ਦਿੱਤਾ ਗਿਆ ਹੈ, ਜੋ ਵਿਰੋਧੀ ਧਿਰਾਂ, ਖਾਸਕਰ ਸੰਘਰਸ਼ਸ਼ੀਲ ਕਿਰਤੀਆਂ, ਕਿਸਾਨਾਂ, ਪੜ੍ਹੇ-ਲਿਖੇ ਨੌਜਵਾਨਾਂ ਉਪਰ ਲੂ ਕੰਡੇ ਖੜ੍ਹੇ ਕਰਨ ਵਾਲਾ ਜ਼ਬਰ ਢਾਹ ਰਿਹਾ ਹੈ। ਜਨ ਸਮੂਹਾਂ ਵਿਚ ਇਸ ਸਰਕਾਰ ਪ੍ਰਤੀ ਨਫਰਤ ਦੀ ਸੀਮਾਂ ਇਸ ਪੱਧਰ 'ਤੇ ਚੜ੍ਹੀ ਹੋਈ ਹੈ ਕਿ ਉਹ ਇਸ ਗਠਜੋੜ ਦੇ ਤੀਸਰੀ ਵਾਰ ਸੱਤਾ ਸੰਭਾਲਣ ਦੇ ਬਾਰੇ ਸੋਚ ਕੇ ਪਹਿਲਾਂ ਹੀ ਭੈ ਭੀਤ ਹੋਈ ਬੈਠੇ ਹਨ। ਅਕਾਲੀ ਦਲ-ਭਾਜਪਾ ਗਠਜੋੜ ਸਰਕਾਰ ਦੇ ਵਿਰੁੱਧ ਜਨਤਕ ਰੋਹ ਚਰਮ ਸੀਮਾਂ ਉਪਰ ਹੈ।
ਇਸ ਅਵਸਥਾ ਤੋਂ ਲਾਹਾ ਲੈ ਕੇ ਕਾਂਗਰਸ ਪਾਰਟੀ ਤੇ 'ਆਪ' ਵਰਗੇ ਦਲ ਪੰਜਾਬ ਦੀ ਸੱਤਾ ਸਾਂਭਣ ਲਈ ਅੱਤ ਦੇ ਝੂਠੇ ਵਾਅਦੇ ਕਰਕੇ ਹਰ ਪਾਪੜ ਵੇਲ ਰਹੇ ਹਨ। ਨਵ ਉਦਾਰਵਾਦੀ ਨੀਤੀਆਂ ਦੀ ਜਨਣੀ ਕਾਂਗਰਸ ਪਾਰਟੀ ਜਿਸ ਦੀਆਂ ਆਰਥਿਕ ਨੀਤੀਆਂ ਕਾਰਨ ਮਹਿੰਗਾਈ, ਬੇਕਾਰੀ, ਭੁਖਮਰੀ, ਅਨਪੜ੍ਹਤਾ ਤੇ ਭਰਿਸ਼ਟਾਚਾਰ ਤੋਂ ਸਿਵਾਏ ਲੋਕਾਂ ਨੂੰ ਹੋਰ ਕੁਝ ਵੀ ਨਸੀਬ ਨਹੀਂ ਹੋਇਆ, ਅੱਜ ਫੇਰ ਲੋਕ ਹਿਤੂ ਹੋਣ ਦਾ ਨਕਾਬ ਪਾ ਕੇ ਪੰਜਾਬ ਦੇ ਲੋਕਾਂ ਨੂੰ ਠੱਗਣਾ ਚਾਹੁੰਦੀ ਹੈ। ਕਾਂਗਰਸੀ ਆਗੂ ਮੌਜੂਦਾ ਸਰਕਾਰ ਨੂੰ ਨਿੱਜੀ ਰੂਪ ਵਿਚ ਭੰਡਣ ਤੇ ਲੋਕਾਂ ਨੂੰ ਸ਼ਬਜਬਾਗ ਦਿਖਾ ਕੇ ਉਨ੍ਹਾਂ ਦੀ ਇਹ ਸਮਝਦੇ ਹਨ ਕਿ ਅਕਾਲੀਆਂ ਤੇ ਭਾਜਪਾਈਆਂ ਦੇ ਸਤਾਏ ਲੋਕਾਂ ਉਨ੍ਹਾਂ ਉਨ੍ਹਾਂ ਦੀ ਝੋਲੀ ਵੋਟਾਂ ਨਾਲ ਭਰ ਦੇਣਗੇ? ਜਿਵੇਂ ਕਾਠ ਦੀ ਗੱਡੀ ਵਾਰ-ਵਾਰ ਚੁਲ੍ਹੇ ਨਹੀਂ ਚੜ੍ਹਦੀ, ਇਸੇ ਤਰ੍ਹਾਂ ਭਾਂਪਿਆ ਜਾ ਸਕਦਾ ਹੈ ਕਿ ਕਾਂਗਰਸ, ਵਰਗੀ ਸਾਮਰਾਜ ਨਿਰਦੇਸ਼ਤ ਆਰਥਿਕ ਨੀਤੀਆਂ ਦਾ ਮੁੱਢ ਬੰਨਣ ਵਾਲੀ ਤੇ ਸਰਕਾਰੀ ਖੇਤਰ ਦਾ ਭੋਗ ਪਾ ਕੇ ਦੇਸ਼ ਨੂੰ ਨਿੱਜੀਕਰਨ ਤੇ ਠੇਕੇਦਾਰੀ ਦੀ ਪਟੜੀ ਚਾੜ੍ਹਨ ਵਾਲੀ, ਪਾਰਟੀ ਤੋਂ ਪੰਜਾਬ ਦੇ ਅਣਖੀ ਲੋਕ ਧੋਖਾ ਨਹੀਂ ਖਾਣਗੇ।
'ਆਪ' ਜਿਸਨੇ 'ਆਮ ਆਦਮੀ' ਦੇ ਨਾਮ ਦੀ ਘੋਰ ਦੁਰਵਰਤੋਂ ਤੇ ਲੋਕ ਲੁਭਾਉਣੇ ਵਾਅਦੇ ਕਰਕੇ ਤੇ ਖਾਸਕਰ ਭਰਿਸ਼ਟਾਚਾਰ ਨੂੰ ਖਤਮ ਕਰਕੇ ਭਰਿਸ਼ਟਾਚਾਰ ਰਹਿਤ ਪ੍ਰਬੰਧ ਸਭ ਨੂੰ ਰੁਜਗਾਰ ਦੇਣ ਵਾਲਾ ਤੇ ਗਰੀਬਾਂ ਦੇ ਕਰਜ਼ੇ ਮੁਆਫ ਕਰਨ ਵਾਲਾ ਰਾਜ ਸਥਾਪਤ ਕਰਕੇ, ਲੋਕਾਂ ਖਾਸਕਰ ਦਰਮਿਆਨੇ ਤਬਕੇ ਦੇ ਨੌਜਵਾਨ ਲੜਕੇ-ਲੜਕੀਆਂ ਉਪਰ ਵਿਸ਼ੇਸ਼ ਪ੍ਰਭਾਵ ਪਾਇਆ ਸੀ। ਅੱਜ ਆਪਣੀ ਦਿੱਲੀ ਸਰਕਾਰ ਦੀ ਘਟੀਆ ਕਾਰਗੁਜ਼ਾਰੀ, 'ਆਪ' ਨੇਤਾਵਾਂ ਵਲੋਂ ਕੀਤੀਆਂ ਜਾ ਰਹੀਆਂ ਭਰਿਸ਼ਟ, ਧੋਖਾਧੜੀ ਵਾਲੀਆਂ ਤੇ ਗੈਰ ਇਖਲਾਕੀ ਹਰਕਤਾਂ ਸਦਕਾ, ਆਮ ਲੋਕਾਂ ਦੇ ਮਨਾਂ ਵਿਚੋਂ ਲਗਾਤਾਰ ਨਿੱਖੜਦੀ ਜਾ ਰਹੀ ਹੈ। ਭਾਵੇਂ ਕਿ ਹਾਲੇ ਵੀ ਅਕਾਲੀ ਦਲ-ਭਾਜਪਾ ਵਿਰੁੱਧ ਲੋਕ ਰੋਹ ਦੀ ਉਠੀ ਲਹਿਰ ਦਾ ਇਕ ਹਿੱਸਾ 'ਆਪ' ਦੁਆਲੇ ਜ਼ਰੂਰ ਗੋਲਬੰਦ ਹੋ ਰਿਹਾ ਹੈ। 'ਆਪ' ਦੀ ਕਾਰਗੁਜਾਰੀ ਤੇ ਵਿਵਹਾਰ ਤੋਂ ਖ਼ਫ਼ਾ ਹੋ ਕੇ ਇਸਦੇ ਆਗੂਆਂ ਤੇ ਧਰਾਤਲ ਦੀ ਪੱਧਰ ਉਪਰ ਕੰਮ ਕਰਨ ਵਾਲੇ 'ਵਲੰਟੀਅਰਜ਼' ਦਾ ਇਕ ਹਿੱਸਾ ਭਾਵੇਂ ਇਸਤੋਂ ਬਾਹਰ ਆ ਗਿਆ ਹੈ, ਪ੍ਰੰਤੂ ਅਜੇ ਉਹ ਕਿਸੇ ਹੋਰ ਲੋਕ ਪੱਖੀ ਤੇ ਜਮਹੂਰੀ ਰਾਜਨੀਤਕ ਮੁਤਬਾਦਲ ਦੇ ਨਾ ਉਭਰਨ ਦੀ ਹਾਲਤ ਵਿਚ 'ਸ਼ਸ਼ੋਪੰਜ' ਦੀ ਅਵਸਥਾ ਵਿਚ ਹੈ।
ਇਹ ਨਾਜੁਕ ਸਮਾਂ ਕਮਿਊਨਿਸਟ ਪਾਰਟੀਆਂ ਤੇ ਹੋਰ ਦੂਸਰੀਆਂ ਜਮਹੂਰੀ ਸ਼ਕਤੀਆਂ ਨੂੰ ਇਕ ਐਸਾ ਮੌਕਾ ਪ੍ਰਦਾਨ ਕਰਦਾ ਹੈ ਕਿ ਉਹ ਆਪਣੇ ਪਿਛਲੇ ਲੋਕ ਹਿਤਾਂ ਲਈ ਜੂਝਣ ਵਾਲੇ ਧਰਮ ਨਿਰਪੱਖ ਤੇ ਜਮਹੂਰੀ ਪੈਂਤੜੇ ਤੋਂ ਫਿਰਕੂ ਸ਼ਕਤੀਆਂ ਵਿਰੁੱਧ ਲੜਦਿਆਂ ਆਪਣੀਆਂ ਜਾਨਾਂ ਵਾਰਨ ਅਤੇ ਮੁਢ ਤੋਂ ਹੀ ਸਾਮਰਾਜ ਨਿਰਦੇਸ਼ਤ ਨਵਉਦਾਰਵਾਦੀ ਆਰਥਿਕ ਨੀਤੀਆਂ ਦੇ ਖਿਲਾਫ ਲੜੇ ਗਏ ਸੰਘਰਸ਼ਾਂ ਸਦਕਾ ਅਕਾਲੀ ਦਲ-ਭਾਜਪਾ ਸਰਕਾਰ ਪ੍ਰਤੀ ਲੋਕਾਂ ਵਿਚ ਪੈਦਾ ਹੋਏ ਰੋਹ ਨੂੰ ਖੱਬੀ ਤੇ ਜਮਹੂਰੀ ਦਿਸ਼ਾ ਵੱਲ ਮੋੜਾ ਦੇ ਕੇ ਪ੍ਰਾਂਤ ਵਿਚ ਇਕ ਮਜ਼ਬੂਤ ਇਨਕਲਾਬੀ ਲਹਿਰ ਉਸਾਰਨ ਦਾ ਨੀਂਹ ਪੱਥਰ ਰੱਖਣ। ਇਹ ਸੇਧ ਲੈਂਦਿਆਂ ਹੋਇਆਂ ਕਾਂਗਰਸ ਤੇ 'ਆਪ' ਵਰਗੀਆਂ ਮੌਕਾਪ੍ਰਸਤ ਤੇ ਨਵਉਦਾਰਵਾਦੀ ਆਰਥਿਕ ਨੀਤੀਆਂ ਦੀਆਂ ਮੁੜੈਲੀ ਰਾਜਨੀਤਕ ਪਾਰਟੀਆਂ ਨਾਲ ਕੋਈ ਸਿੱਧਾ ਜਾਂ ਅਸਿੱਧਾ ਗਠਜੋੜ ਜਾ ਲਿਹਾਜੂ ਵਤੀਰਾ ਸਮੂਹ ਕਿਰਤੀਆਂ ਦੇ ਹਿਤਾਂ ਨਾਲ ਗੱਦਾਰੀ ਕਰਨ ਦੇ ਸਮਾਨ ਹੋਵੇਗਾ, ਜੋ ਅਕਾਲੀ ਦਲ-ਭਾਜਪਾ, ਕਾਂਗਰਸ ਤੇ ਆਪ ਤੋਂ ਭਿੱਨ ਕੋਈ ਲੋਕ ਪੱਖੀ ਰਾਜਸੀ ਮੁਤਬਾਦਲ ਉਸਾਰਨ ਲਈ ਸਮੂਹ ਖੱਬੀਆਂ ਧਿਰਾਂ ਤੋਂ ਭਾਰੀ ਆਸਾਂ ਲਾਈ ਬੈਠੀਆਂ ਹਨ। ਇਨ੍ਹਾਂ ਤਿੰਨਾਂ ਲੋਕ ਦੁਸ਼ਮਣ ਰਾਜਸੀ ਧਿਰਾਂ ਤੋਂ ਬਾਹਰ ਬੈਠੇ ਖੱਬੇ ਤੇ ਜਮਹੂਰੀ ਤੱਤ ਵੀ ਤਦ ਹੀ ਕੋਈ ਹਾਂ ਪੱਖੀ ਪੈਂਤੜਾ ਲੈ ਸਕਣਗੇ, ਜੇਕਰ ਪੰਜਾਬ ਦੀਆਂ ਚਾਰ ਖੱਬੀਆਂ ਪਾਰਟੀਆਂ, ਜੋ ਪਿਛਲੇ ਦੋ ਕੁ ਸਾਲਾਂ ਤੋਂ ਲੋਕ ਮੁੱਦਿਆਂ ਉਪਰ ਅਧਾਰਤ ਸਾਂਝੇ ਘੋਲ ਲਾਮਬੰਦ ਕਰਦੀਆਂ ਰਹੀਆਂ ਹਨ, ਇਕਮੁਠ ਰਹਿਕੇ ਅਸੂਲੀ ਪੈਂਤੜਾ ਲੈਣ। ਆਮ ਲੋਕਾਂ ਦੀ ਇਹ ਵੀ ਧਾਰਨਾ ਹੈ ਕਿ ਕਈ ਖੱਬੇ ਪੱਖੀ ਦਲ ਚੋਣਾਂ ਤੋਂ ਪਹਿਲਾਂ ਤਾਂ ਹਾਕਮ ਲੁਟੇਰੀਆਂ ਜਮਾਤਾਂ ਦੀਆਂ ਪਾਰਟੀਆਂ ਵਿਰੁੱਧ ਅਵਾਜ ਉਠਾਉਂਦੇ ਰਹਿੰਦੇ ਹਨ, ਪ੍ਰੰਤੂ ਚੋਣਾਂ ਵਿਚ ਇਹ ਕਿਸੇ ਨਾ ਕਿਸੇ ਲੁਟੇਰੀ ਰਾਜਨੀਤਕ ਪਾਰਟੀ ਨਾਲ ਸਾਂਝਾਂ ਪਾ ਲੈਂਦੇ ਹਨ। ਇਨ੍ਹਾਂ ਚੋਣਾਂ ਵਿਚ ਖੱਬੀ ਧਿਰ ਉਪਰ ਲੱਗ ਰਿਹਾ ਇਹ ਇਲਜ਼ਾਮ ਵੀ ਧੋਤਾ ਜਾਣਾ ਚਾਹੀਦਾ ਹੈ।
ਇਸ ਲਈ ਅਸੀਂ ਸਾਰੀਆਂ ਹੀ ਖੱਬੀਆਂ ਤੇ ਜਮਹੂਰੀ ਧਿਰਾਂ ਨੂੰ ਪੁਰਜ਼ੋਰ ਤੇ ਦਿਲ ਦੀਆਂ ਗਹਿਰਾਈਆਂ ਤੋਂ ਅਪੀਲ ਕਰਦੇ ਹਾਂ ਕਿ ਉਹ ਅਕਾਲੀ ਦਲ-ਭਾਜਪਾ ਗਠਜੋੜ, ਕਾਂਗਰਸ ਤੇ ਆਪ ਵਿਰੁੱਧ ਆਰਥਿਕ ਨੀਤੀਆਂ ਦੇ ਪੱਖ ਤੋਂ ਅਸੂਲੀ ਪੈਂਤੜਾ ਲੈ ਕੇ ਪ੍ਰਾਂਤ ਅੰਦਰ ਖੱਬੀਆਂ ਤੇ ਜਮਹੂਰੀ ਸ਼ਕਤੀਆਂ ਦੇ ਵਾਧੇ ਲਈ ਰਾਹ ਮੋਕਲਾ ਕਰਨ। ਇਸ ਸੇਧ ਨਾਲ ਅਸੀਂ ਭਰੋਸੇ ਨਾਲ ਇਹ ਵੀ ਆਖ ਸਕਦੇ ਹਾਂ ਆਪਣੀ ਆਜ਼ਾਦ ਹਸਤੀ ਤੇ ਵਿਚਾਰਧਾਰਕ ਪਰਪੱਕਤਾ ਨਾਲ ਮਿਹਨਤਕਸ਼ ਲੋਕਾਂ ਦੀ ਹਮਾਇਤ ਨਾਲ ਕਾਫੀ ਲੰਬੇ ਸਮੇਂ ਬਾਅਦ ਪੰਜਾਬ ਅਸੈਂਬਲੀ ਵਿਚ ਖੱਬੇ ਪੱਖੀਆਂ ਦੀ ਲੋਕਾਂ ਹਿਤਾਂ ਦੀ ਰਾਖੀ ਦੀ ਗਰਜਵੀਂ ਆਵਾਜ਼ ਵੀ ਸੁਣੀ ਜਾ ਸਕੇਗੀ।
- ਮੰਗਤ ਰਾਮ ਪਾਸਲਾ