ਵਿਛੜੇ ਸਾਥੀ ਅਮਰਜੀਤ ਸਿੰਘ ਕਲਾਰ ਦਾ ਸ਼ਰਧਾਂਜਲੀ ਸਮਾਗਮ

ਸੀ.ਪੀ.ਐਮ.ਪੰਜਾਬ ਦੇ ਉਸਰੱਈਆਂ 'ਚੋਂ ਇਕ, ਆਪਣਾ ਸਾਰਾ ਜੀਵਨ ਕਿਰਤੀ-ਕਿਸਾਨਾਂ ਨੂੰ ਲੁੱਟ ਦੇ ਰਾਜ ਤੋਂ ਮੁਕਤੀ ਦੁਆਉਣ ਦੇ ਸੰਗਰਾਮ ਦੇ ਲੇਖੇ ਲਾਉਣ ਵਾਲੇ ਕਾਮਰੇਡ ਅਮਰਜੀਤ ਸਿੰਘ ਕਲਾਰ ਦਾ ਸ਼ਰਧਾਂਜਲੀ ਸਮਾਗਮ ਲੰਘੀ 30 ਦਸੰਬਰ ਨੂੰ ਕਸਬਾ ਆਲੀਵਾਲ ਦੇ ਨੇੜੇ ਅੱਡਾ ਬੁਲ੍ਹੋਵਾਲ ਵਿਖੇ ਸਰਵਸਾਥੀ ਅਜੀਤ ਸਿੰਘ ਸਿਧਵਾਂ, ਦਲਬੀਰ ਸਿੰਘ ਅਤੇ ਸੰਤੋਖ ਸਿੰਘ ਔਲਖ 'ਤੇ ਅਧਾਰਤ ਪ੍ਰਧਾਨਗੀ ਮੰਡਲ ਦੀ ਪ੍ਰਧਾਨਗੀ ਹੇਠ ਹੋਇਆ। ਪਾਰਟੀ ਦੀ ਗੁਰਦਾਸਪੁਰ-ਪਠਾਨਕੋਟ ਜ਼ਿਲ੍ਹਾ ਇਕਾਈ ਨੇ ਇਸ ਸਮਾਗਮ ਦਾ  ਸੁਚੱਜਾ ਪ੍ਰਬੰਧ ਕੀਤਾ।
ਸੀ.ਪੀ.ਐਮ.ਪੰਜਾਬ ਦੀ ਸਮੁੱਚੀ ਸਕੱਤਰੇਤ, ਸੂਬਾ ਕਮੇਟੀ ਮੈਂਬਰ ਦੂਰ ਦੁਰਾਡੇ ਤੋਂ ਆਪਣੇ ਪ੍ਰੇਰਣਾਮਈ ਸਾਥੀ ਨੂੰ ਅਕੀਦਤ ਭੇਂਟ ਕਰਨ ਲਈ ਪੁੱਜੇ। ਮੰਚ 'ਤੇ ਕਾਮਰੇਡ ਕਲਾਰ ਦੇ ਤਕਰੀਬਨ ਸਾਰੇ ਪਰਵਾਰਕ ਮੈਂਬਰ ਬਿਰਾਜਮਾਨ ਸਨ।
ਕਾਮਰੇਡ ਕਲਾਰ ਹੋਰਾਂ ਦੀ ਮਿਲਾਪੜੀ ਸ਼ਖਸ਼ੀਅਤ ਅਤੇ ਆਪਾਵਾਰੂ ਸੰਗਰਾਮੀ ਜੀਵਨ ਦੇ ਹਾਂ ਪੱਖੀ ਪ੍ਰਭਾਵ ਦਾ ਝਲਕਾਰ ਇਸ ਗੱਲ ਤੋਂ ਹੀ ਰੂਪਮਾਨ ਹੋ ਜਾਂਦਾ ਹੈ ਕਿ ਪੰਜਾਬ ਦੀਆਂ ਸਾਰੀਆਂ ਖੱਬੀਆਂ ਪਾਰਟੀਆਂ ਦੇ ਆਗੂ ਉਨ੍ਹਾਂ ਨੂੰ ਨਮਨ ਕਰਨ ਲਈ ਪੁੱਜੇ।
ਅਨੇਕਾਂ ਲੋਕ ਜਿਨ੍ਹਾਂ ਨੇ ਕਾਮਰੇਡ ਕਲਾਰ ਹੋਰਾਂ ਨਾਲ ਕਦੀ ਸਾਂਝੇ ਪਲ ਬਿਤਾਏ ਸਨ ਉਹ ਵੀ ਅਤੇ ਜਿਨ੍ਹਾਂ ਨੇ ਉਨ੍ਹਾਂ ਨਾਲ ਮਿਲਕੇ ਘਾਲਣਾਵਾਂ ਘਾਲੀਆਂ ਉਹ ਵੀ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਹੋਏ। ਪ੍ਰੰਤੂ ਸਮਾਗਮ ਦਾ ਸ਼ਾਨਦਾਰ ਪੱਖ ਇਹ ਸੀ ਕਿ ਦੂਰ ਦਰਾਡੇ ਤੋਂ ਕਿਰਤੀ-ਕਿਸਾਨਾਂ-ਨੌਜਵਾਨਾਂ-ਬੀਬੀਆਂ ਦੇ ਵਿਸ਼ਾਲ ਕਾਫ਼ਲੇ ਇਸ ਸਮਾਗਮ ਵਿਚ ਆਪਣੇ ਵਿਛੜੇ ਮਹਿਬੂਬ ਸਾਥੀ ਨੂੰ ਸੰਗਰਾਮੀ ਲਾਲ ਸਲਾਮ ਕਹਿੰਦਿਆਂ ਨਾਹਰੇ ਮਾਰਦੇ ਸ਼ਰਧਾਂਜਲੀ ਦੇਣ ਲਈ ਪੁੱਜੇ।
ਸਮੁੱਚੇ ਸਮਾਗਮ ਦੇ ਕ੍ਰਿਆਕਲਾਪਾਂ 'ਚੋਂ ਕਾਮਰੇਡ ਕਲਾਰ ਦੀ ਸ਼ਖਸ਼ੀਅਤ ਦਾ ਆਮ ਲੋਕਾਂ ਉਪਰ ਵਸੀਹ ਹਾਂ ਪੱਖੀ ਪ੍ਰਭਾਵ ਝਲਕਾਰੇ ਮਾਰਦਾ ਸੀ।
ਸ਼ਰਧਾਂਜਲੀ ਸਮਾਗਮ ਨੂੰ ਸੰਬੋਧਨ ਕਰਨ ਵਾਲੇ ਆਗੂਆਂ ਸਰਵਸਾਥੀ ਮੰਗਤ ਰਾਮ ਪਾਸਲਾ, ਹਰਕੰਵਲ ਸਿੰਘ, ਰਘੁਬੀਰ ਸਿੰਘ ਬਟਾਲਾ, ਕੁਲਵੰਤ ਸਿੰਘ ਸੰਧੂ, ਗੁਰਨਾਮ ਸਿੰਘ ਦਾਊਦ, ਨੱਥਾ ਸਿੰਘ, ਬੀਬੀ ਨੀਲਮ ਘੁਮਾਣ, ਗੁਰਮੀਤ ਸਿੰਘ ਬਖਤਪੁਰਾ ਸਕੱਤਰ ਸੀ.ਪੀ.ਆਈ.(ਐਮ.ਐਲ.) ਲਿਬਰੇਸ਼ਨ, ਧਿਆਨ ਸਿੰਘ ਠਾਕੁਰ ਜ਼ਿਲ੍ਹਾ ਸਕੱਤਰ ਸੀ.ਪੀ.ਆਈ.(ਐਮ), ਗੁਲਜਾਰ ਸਿੰਘ ਬਸੰਤਕੋਟ ਜ਼ਿਲ੍ਹਾ ਸਕੱਤਰ ਸੀ.ਪੀ.ਆਈ. ਨੇ ਉਹਨਾਂ ਨਾਲ ਬਿਤਾਈਆਂ ਆਪਣੀਆਂ ਯਾਦਾਂ ਅਤੇ ਉਨ੍ਹਾਂ ਦੀ ਸ਼ਖਸ਼ੀਅਤ ਦੀਆਂ ਦੂਜਿਆਂ ਲਈ ਖਿੱਚਪਾਊ ਗੁਣਾਂ ਦਾ ਜਜਬਾਤੀ ਜ਼ਿਕਰ ਕਰਦਿਆਂ ਉਨ੍ਹਾਂ ਨੂੰ ਸ਼ਰਧਾਂਜਲੀ ਭੇਂਟ ਕੀਤੀ। ਸਾਰਿਆਂ ਨੇ ਉਨ੍ਹਾਂ ਦੇ ਜੀਵਨ ਦੇ ਹਾਂ ਪੱਖੀ ਗੁਣਾਂ ਤੋਂ ਪ੍ਰੇਰਣਾ ਲੈਣ ਅਤੇ ਉਨ੍ਹਾਂ ਦੇ ਜੀਵਨ ਦੇ ਮਿਥੇ ਨਿਸ਼ਾਨਿਆਂ ਦੀ ਪੂਰਤੀ ਲਈ ਪੂਰਾ ਜੀਵਨ ਲਾਉਣ ਦਾ ਪ੍ਰਣ ਕੀਤਾ। ਸਭਨਾਂ ਆਗੂਆਂ ਨੇ ਹਾਜ਼ਰ ਕਿਰਤੀ ਕਿਸਾਨਾਂ ਤੇ ਖੱਬੀ ਅਤੇ ਜਮਹੂਰੀ ਲਹਿਰ ਦੇ ਕਾਰਕੁੰਨਾਂ ਨੂੰ ਸਾਥੀ ਅਮਰਜੀਤ ਕਲਾਰ ਦੇ ਪਦਚਿੰਨ੍ਹਾਂ 'ਤੇ ਚੱਲਣ ਦੀ ਅਪੀਲ ਕੀਤੀ। ਸੁਭਾਵਿਕ ਹੀ ਸਾਰੇ ਆਗੂਆਂ ਨੇ 2014 'ਚ ਵਿਛੋੜਾ ਦੇ ਗਈ, ਹਰ ਔਖ-ਸੌਖ 'ਚ ਉਨ੍ਹਾਂ ਦੋ ਮੋਢੇ ਨਾਲ ਮੋਢਾ ਜੋੜ ਕੇ ਤੁਰਨ ਵਾਲੀ ਉਨ੍ਹਾਂ ਦੀ ਜੀਵਨ ਸਾਥਣ ਬੀਬੀ ਸਵਿੱਤਰ ਕੌਰ ਨੂੰ ਵੀ ਵਿਸ਼ੇਸ਼ ਤੌਰ 'ਤੇ ਯਾਦ ਕੀਤਾ।
ਸਾਰੇ ਆਗੂਆਂ ਨੇ ਇਸ ਮੌਕੇ ਕਿਹਾ ਕਿ ਅਜੋਕੇ ਦੌਰ ਦੀਆਂ ਮੁੱਖ ਚੁਣੌਤੀਆਂ; ਸਾਮਰਾਜੀ ਨੀਤੀਆਂ ਅਤੇ ਉਨ੍ਹਾਂ ਦੇ ਸਿੱਟੇ ਵਜੋਂ ਵੱਧ ਰਹੀ ਭਾਰਤ ਅਤੇ ਸੰਸਾਰ ਭਰ ਦੀ ਲੋਕਾਈ ਦੀ ਗੁਰਬਤ, ਫਿਰਕੂ-ਫੁੱਟਪਾਊ ਤਾਕਤਾਂ ਵਲੋਂ ਕਿਰਤੀ ਕਿਸਾਨਾਂ 'ਤੇ ਹੋਰ ਸੰਗਰਾਮੀ ਤਬਕਿਆਂ ਦੀ ਏਕਤਾ ਨੂੰ ਲੀਰੋ ਲੀਰ ਕਰਨ ਦੇ ਕੋਝੇ ਇਰਾਦਿਆਂ ਅਤੇ ਕੇਂਦਰੀ ਤੇ ਸੂਬਾਈ ਸਰਕਾਰਾਂ ਵਲੋਂ ਲੋਕਾਂ ਦੇ ਹੱਕੀ ਸੰਰਗਾਮਾਂ ਨੂੰ ਫੇਲ੍ਹ ਕਰਨ ਲਈ ਵਰਤੇ ਜਾ ਰਹੇ ਜਾਬਰ ਹਥਕੰਡਿਆਂ ਵਿਰੁੱਧ ਖੱਬੀਆਂ ਧਿਰਾਂ ਦੇ ਸਾਂਝੇ ਸੰਗਰਾਮ ਅਤੇ ਅੱਗੋਂ ਖੱਬੀਆਂ ਅਗਾਂਹਵਧੂ ਜਮਹੂਰੀ ਸੰਘਰਸ਼ਸ਼ੀਲ ਸ਼ਕਤੀਆਂ ਦੇ ਵਿਸ਼ਾਲ ਸੰਗਰਾਮ ਦੀ ਉਸਾਰੀ ਹੀ ਸਾਥੀ ਅਮਰਜੀਤ ਸਿੰਘ ਕਲਾਰ ਨੂੰ ਸੱਚੀ ਸ਼ਰਧਾਂਜਲੀ ਹੋਵੇਗੀ। ਬਹੁਗਿਣਤੀ ਬੁਲਾਰਿਆਂ ਨੇ ਹਾਲੀਆ ਬਿਹਾਰ ਵਿਧਾਨ ਸਭਾ ਚੋਣਾਂ 'ਚ ਖੱਬੀ ਧਿਰ ਵਲੋਂ ਲਏ ਪੈਂਤੜੇ ਅਤੇ ਕਾਰਗੁਜਾਰੀ ਨੂੰ ਅੱਜ ਦੇ ਦੌਰ ਦਾ ਢੁੱਕਵਾਂ ਰੋਲ ਮਾਡਲ ਕਿਹਾ।
ਇਸ ਸਮਾਗਮ ਵਿਚ ਹੋਰਨਾਂ ਤੋਂ ਇਲਾਵਾ ਇੰਦਰਜੀਤ ਗਰੇਵਾਲ, ਮਹੀਪਾਲ, ਪਰਗਟ ਸਿੰਘ ਜਾਮਾਰਾਏ, ਰਵੀ ਕੰਵਰ, ਗੁਰਨਾਮ ਸਿੰਘ ਸੰਘੇੜਾ, ਸਤਨਾਮ ਸਿੰਘ ਅਜਨਾਲਾ, ਸ਼ਿਵ ਕੁਮਾਰ ਪਠਾਨਕੋਟ, ਹਰਿੰਦਰ ਸਿੰਘ ਰੰਧਾਵਾ, ਲਾਲ ਚੰਦ ਸਰਦੂਲਗੜ੍ਹ, ਮਹਿੰਦਰ ਸਿੰਘ ਖੈਹੜ, ਪ੍ਰਿੰਸੀਪਲ ਪਿਆਰਾ ਸਿੰਘ, ਹਰਦੀਪ ਸਿੰਘ, ਛੱਜੂ ਰਾਮ ਰਿਸ਼ੀ, ਜਸਪਾਲ ਸਿੰਘ ਝਬਾਲ ਆਦਿ ਸੂਬਾਈ ਆਗੂ ਵੀ ਹਾਜ਼ਰ ਸਨ।
ਸਾਥੀ ਅਮਰਜੀਤ ਸਿੰਘ ਕਲਾਰ ਦੇ ਯੁੱਧ ਸਾਥੀ ਮੁਲਖ ਰਾਜ ਗੁਰਦਾਸਪੁਰ, ਉਘੇ ਗਜ਼ਲਗੋਅ ਸਾਥੀ ਮੱਖਣ ਕੁਹਾੜ, ਮੰਗਤ ਚੰਚਲ ਅਤੇ ਹੋਰਨਾਂ ਲੋਕ ਪੱਖੀ ਕਲਾਕਾਰਾਂ ਨੇ ਭਾਵਪੂਰਤ ਗੀਤਾਂ, ਗਜ਼ਲਾਂ, ਨਜ਼ਮਾਂ ਦੀ ਪੇਸ਼ਕਾਰੀ ਕੀਤੀ।
ਸਾਥੀ ਅਮਰਜੀਤ ਸਿੰਘ ਕਲਾਰ ਦੇ ਜੁਝਾਰੂ ਘਟਨਾਵਾਂ ਭਰਪੂਰ ਸੰਗਰਾਮੀ ਤੇ ਪ੍ਰੇਰਣਾਮਈ ਜੀਵਨ 'ਤੇ ਝਾਤ ਪਾਉਂਦੀ ਉਨ੍ਹਾਂ ਦੀ ਸਵੈਜੀਵਨੀ ਦੀ ਭਾਰੀ ਵਿਕਰੀ ਨੇ ਲੋਕਾਂ 'ਚ ਉਨ੍ਹਾਂ ਪ੍ਰਤੀ ਲਗਾਓ ਨੂੰ  ਹੋਰ ਉਜਾਗਰ ਕੀਤਾ।
ਸਟੇਜ ਸਕੱਤਰ ਦੇ ਫਰਜ਼ ਸਾਥੀ ਲਾਲ ਚੰਦ ਕਟਾਰੂਚੱਕ ਨੇ ਨਿਭਾਏ।