ਪੈਰਿਸ ਤੋਂ ਛਪਦੇ ਵਿਅੰਗ-ਰਸਾਲੇ 'ਸ਼ਾਰਲੀ ਐਬਦੋ' ਦੇ ਦਫਤਰ 'ਤੇ ਪਿਛਲੇ ਦਿਨੀਂ 7 ਜਨਵਰੀ ਨੂੰ ਅੱਤਵਾਦੀਆਂ ਨੇ ਹਮਲਾ ਕਰ ਦਿੱਤਾ ਜਿਸ ਵਿਚ ਇਸ ਦੇ 12 ਪੱਤਰਕਾਰ ਤੇ ਮੁਲਾਜ਼ਮ ਮਾਰੇ ਗਏ। ਇਹ ਹਮਲਾ ਇਸ ਰਸਾਲੇ ਵਲੋਂ ਪੈਗੰਬਰ ਮੁਹੰਮਦ ਸਾਹਿਬ ਦੇ ਕਾਰਟੂਨ ਛਾਪਣ ਵਿਰੁੱਧ ਕੀਤਾ ਗਿਆ। ਇਸ ਹਮਲੇ ਦੀ ਦੁਨੀਆਂ ਭਰ 'ਚ ਨਿੰਦਾ ਹੋਈ ਹੈ। ਇਹ ਹਮਲਾ ਵਿਚਾਰਾਂ ਦੇ ਪ੍ਰਗਟਾਵੇ ਦੀ ਆਜ਼ਾਦੀ 'ਤੇ ਹਮਲਾ ਹੈ। ਹਰ ਇਕ ਨੂੰ ਆਪਣੇ ਵਿਚਾਰ ਪ੍ਰਗਟਾਉਣ ਦਾ ਪੂਰਾ ਅਧਿਕਾਰ ਹੈ ਤੇ ਹਰ ਇਕ ਨੂੰ ਕਿਸੇ ਦੂਸਰੇ ਦੇ ਵਿਚਾਰਾਂ ਨਾਲ ਅਸਹਿਮਤ ਹੋਣ ਦੀ ਵੀ ਆਜ਼ਾਦੀ ਹੈ ਪਰ ਇਹ ਅਸਹਿਮਤੀ ਕਿਸੇ ਦੀ ਜਾਨ ਲੈਣ ਤੱਕ ਨਹੀਂ ਚਲੀ ਜਾਣੀ ਚਾਹੀਦੀ। 'ਸ਼ਾਰਲੀ ਐਬਦੋ' ਆਪਣੇ ਵਿਅੰਗਾਤਮਕ ਕਾਰਟੂਨਾਂ ਲਈ ਜਾਣਿਆ ਜਾਂਦਾ ਹੈ। ਇਸ ਵਲੋਂ ਕਈ ਮੌਕਿਆਂ 'ਤੇ ਪੈਗੰਬਰ ਮੁਹੰਮਦ ਸਾਹਿਬ ਦੇ ਕਾਰਟੂਨ ਛਾਪੇ ਜਾਂਦੇ ਰਹੇ ਹਨ ਜਿਨ੍ਹਾਂ ਨੂੰ ਲੈ ਕੇ ਹੰਗਾਮਾ ਵੀ ਖੜਾ ਹੁੰਦਾ ਰਿਹਾ ਹੈ।
ਨੋਟ ਕਰਨ ਵਾਲੀ ਗੱਲ ਹੈ ਕਿ 'ਸ਼ਾਰਲੀ ਐਬਦੋ' 'ਤੇ ਹਮਲਾ ਪੈਗੰਬਰ ਮੁਹੰਮਦ ਸਾਹਿਬ ਦੇ ਕਾਰਟੂਨ ਛਾਪਣ ਕਾਰਨ ਹੋਇਆ ਹੈ ਤੇ ਇਸ ਨੇ ਹਮਲੇ ਤੋਂ ਬਾਅਦ ਆਪਣਾ ਪ੍ਰਕਾਸ਼ਨ ਮੁੜ ਮੁਹੰਮਦ ਸਾਹਿਬ ਦਾ ਕਾਰਟੂਨ ਛਾਪ ਕੇ ਕੀਤਾ ਹੈ। ਇਹ ਗੱਲ ਸਭ ਨੂੰ ਭਲੀਭਾਂਤ ਪਤਾ ਹੈ ਕਿ ਮੁਸਲਿਮ ਭਾਈਚਾਰਾ ਪੈਗੰਬਰ ਮੁਹੰਮਦ ਸਾਹਿਬ ਨੂੰ ਮਜ਼ਾਕ ਦਾ ਪਾਤਰ ਬਣਾਏ ਜਾਣਾ ਬਰਦਾਸ਼ਤ ਨਹੀਂ ਕਰਦਾ, ਫਿਰ ਮੁੜ ਕੇ ਉਹੀ ਗਲਤੀ ਕਰਨਾ ਵੀ ਜਾਇਜ਼ ਨਹੀਂ ਹੈ।
ਧਰਮ ਇਕ ਬਹੁਤ ਹੀ ਸੰਵੇਦਨਸ਼ੀਲ ਮਾਮਲਾ ਹੈ। ਇਸ ਸੰਬੰਧ ਵਿਚ ਗੱਲ ਕਰਨ ਲੱਗਿਆਂ ਬਹੁਤ ਹੀ ਚੌਕਸੀ ਵਰਤਣੀ ਪੈਂਦੀ ਹੈ। ਕਿਸੇ ਧਰਮ ਦੇ ਗੁਰੂ ਬਾਰੇ ਛੇੜਖਾਨੀਆਂ ਕਰਕੇ ਇਹ ਆਸ ਰੱਖਣੀ ਕਿ ਭੜਕਾਹਟ ਪੈਦਾ ਨਹੀਂ ਹੋਵੇਗੀ, ਕਿਸੇ ਵੀ ਤਰ੍ਹਾਂ ਮੁਮਕਿਨ ਨਹੀਂ। 'ਸ਼ਾਰਲੀ ਐਬਦੋ' ਵਲੋਂ ਆਪਣੇ ਰਸਾਲੇ ਦੇ ਕਵਰ ਪੇਜ਼ 'ਤੇ ਛਾਪੇ ਕਾਰਟੂਨ ਵਿਰੁੱਧ ਪਾਕਿਸਤਾਨ, ਅਫਗਾਨਿਸਤਾਨ ਤੇ ਫਲਸਤੀਨ ਸਮੇਤ ਦੁਨੀਆਂ ਭਰ ਦੇ ਮੁਸਲਮਾਨਾਂ ਨੇ ਮੁਜ਼ਾਹਰੇ ਕੀਤੇ ਹਨ।
ਜਿਥੇ ਪ੍ਰੈਸ ਦੀ ਆਜ਼ਾਦੀ ਦਾ ਸਤਿਕਾਰ ਲਾਜ਼ਮੀ ਹੈ, ਉਥੇ ਪ੍ਰੈਸ ਨੂੰ ਵੀ ਆਪਣੀ ਆਜ਼ਾਦੀ ਦੀਆਂ ਸੀਮਾਵਾਂ ਦਾ ਖਿਆਲ ਰੱਖਣਾ ਚਾਹੀਦਾ ਹੈ।
- ਇੰਦਰਜੀਤ ਚੁਗਾਵਾਂ
No comments:
Post a Comment