ਰਾਸ਼ਟਰੀ ਝਰੋਖਾ (ਸੰਗਰਾਮੀ ਲਹਿਰ - ਫਰਵਰੀ 2015)

ਸੈਂਸਰ ਬੋਰਡ ਦੇ ਮੈਂਬਰਾਂ ਦੇ ਅਸਤੀਫੇ
 

ਫਿਲਮ ਸੈਂਸਰ ਬੋਰਡ ਦੀ ਮੁਖੀ ਲੀਲਾ ਸੈਮਸਨ ਨੇ 16 ਜਨਵਰੀ ਨੂੰ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ। ਇਹ ਅਸਤੀਫਾ ਉਹਨਾਂ ਸਿਰਸਾ ਸਥਿਤ ਵਿਵਾਦਪ੍ਰਸਤ ਡੇਰੇ 'ਡੇਰਾ ਸੱਚਾ ਸੌਦਾ'  ਦੇ ਵਿਵਾਦਗ੍ਰਸਤ ਮੁਖੀ ਗੁਰਮੀਤ ਰਾਮ ਰਹੀਮ ਦੀ ਉਸ ਵਿਵਾਦਗ੍ਰਸਤ ਫਿਲਮ 'ਮੈਸੰਜਰ ਆਫ ਗਾਡ' (ਐਮ.ਐਸ.ਜੀ.) ਨੂੰ ਅਪੀਲ ਟ੍ਰਿਬਿਊਨਲ ਵਲੋਂ ਹਰੀ ਝੰਡੀ ਦੇਣ ਖਿਲਾਫ ਦਿੱਤਾ ਹੈ। ਜਿਸ 'ਤੇ ਪਹਿਲਾਂ ਸੈਂਸਰ ਬੋਰਡ ਨੇ ਰੋਕ ਲਾ ਦਿੱਤੀ ਸੀ।
ਲੀਲਾ ਸੈਮਸਨ ਨੇ ਅਸਤੀਫਾ ਦਿੰਦਿਆਂ ਦੋਸ਼ ਲਾਏ ਹਨ ਕਿ ਸੂਚਨਾ ਮੰਤਰਾਲੇ ਵਲੋਂ ਨਿਯੁਕਤ ਕੀਤੇ ਗਏ ਪੈਨਲ ਮੈਂਬਰਾਂ 'ਤੇ ਅਫਸਰਾਂ ਦੇ ਦਖਲ, ਦਬਾਅ ਅਤੇ ਭ੍ਰਿਸ਼ਟਾਚਾਰ ਤੋਂ ਤੰਗ ਆ ਕੇ ਉਹ ਆਪਣੇ ਅਹੁਦੇ 'ਤੇ ਬਣੀ ਨਹੀਂ ਰਹਿਣਾ ਚਾਹੁੰਦੀ। ਉਸ ਨੇ ਇਹ ਵੀ ਦੱਸਿਆ ਕਿ ਸੱਤਾਧਾਰੀ ਪਾਰਟੀ ਦੀ ਵਿਚਾਰਧਾਰਾ ਨੂੰ ਪ੍ਰਣਾਈਆਂ ਹੋਈਆਂ ਕਈ ਭਗਵੀਆਂ ਜਥੇਬੰਦੀਆਂ ਵੱਖੋ-ਵੱਖ ਮੌਕਿਆਂ 'ਤੇ ਸੈਂਸਰ ਬੋਰਡ ਉਪਰ ਦਬਾਅ ਬਣਾਉਂਦੀਆਂ ਆਈਆਂ ਹਨ। ਰੂੜੀਵਾਦੀ ਕਦਰਾਂ-ਕੀਮਤਾਂ 'ਤੇ ਚੋਟ ਮਾਰਨ ਵਾਲੀ ਫਿਲਮ 'ਪੀ.ਕੇ.' ਦੀ ਮਿਸਾਲ ਦਿੰਦਿਆਂ ਉਸ ਨੇ ਦੱਸਿਆ ਕਿ ਇਸ ਫਿਲਮ ਨੂੰ ਰੋਕਣ ਲਈ ਉਸ 'ਤੇ ਬਹੁਤ ਜ਼ਿਆਦਾ ਜ਼ੋਰ ਪਾਇਆ ਗਿਆ ਸੀ।
ਲੀਲਾ ਸੈਮਸਨ ਦੇ ਸਮਰਥਨ 'ਚ ਬੋਰਡ ਦੇ 11 ਹੋਰ ਮੈਂਬਰਾਂ ਨੇ ਵੀ ਅਸਤੀਫੇ ਦੇ ਦਿੱਤੇ ਹਨ। ਸਿੱਟੇ ਵਜੋਂ ਨਵੇਂ ਸੈਂਸਰ ਬੋਰਡ ਦਾ ਗਠਨ ਕਰ ਦਿੱਤਾ ਗਿਆ ਹੈ। ਜਿਸ ਦਾ ਮੁਖੀ ਫਿਲਮਕਾਰ ਪਹਿਲਾਜ ਨਿਹਲਾਨੀ ਨੂੰ ਲਗਾਇਆ ਗਿਆ ਹੈ। ਪਹਿਲਾਜ ਨਿਹਲਾਨੀ ਦੀ ਭਾਜਪਾ ਨਾਲ ਸਾਂਝ ਕੋਈ ਲੁਕੀ ਛਿਪੀ ਨਹੀਂ। ਉਹ ਭਾਜਪਾ ਦੇ ਫਿਲਮ ਸੈਲ ਦਾ ਮੈਂਬਰ ਹੈ ਤੇ ਇਹ ਗੱਲ ਉਹ ਬੜੇ ਫਖਰ ਨਾਲ ਆਖਦਾ ਹੈ ਕਿ ਨਰਿੰਦਰ ਮੋਦੀ ਉਸ ਦੇ ਹੀਰੋ ਹਨ। ਇਸੇ ਸੇਧ ਵਿਚ ਬੋਰਡ ਦੇ ਦੂਸਰੇ ਮੈਂਬਰ ਲਏ ਗਏ ਹਨ। ਉਹ ਜਾਂ ਤਾਂ ਸਿੱਧੇ ਤੌਰ 'ਤੇ ਭਾਜਪਾ ਦੇ ਮੈਂਬਰ ਜਾਂ ਸਮਰਥਕ ਹਨ ਜਾਂ ਉਹ ਆਰ.ਐਸ.ਐਸ. ਨਾਲ ਨੇੜਤਾ ਲਈ ਜਾਣੇ ਜਾਂਦੇ ਹਨ।
ਨਵੇਂ ਬੋਰਡ ਨੇ ਡੇਰਾ ਮੁਖੀ ਦੀ ਫਿਲਮ ਐਮ.ਐਸ.ਜੀ. ਨੂੰ ਸਰਟੀਫਿਕੇਟ ਜਾਰੀ ਕਰ ਦਿੱਤਾ ਹੈ ਪਰ ਇਹ ਫਿਲਮ ਪੰਜਾਬ 'ਚ ਰਿਲੀਜ਼ ਨਹੀਂ ਹੋ ਸਕੀ ਕਿਉਂਕਿ ਪੰਜਾਬ ਸਰਕਾਰ ਨੇ ਇਸ 'ਤੇ ਰੋਕ ਲਾਈ ਹੋਈ ਹੈ। ਲਗਭਗ ਸਾਰੀਆਂ ਸਿੱਖ ਸੰਸਥਾਵਾਂ ਇਸ ਫਿਲਮ ਦੇ ਵਿਰੋਧ 'ਚ ਖੜ੍ਹੀਆਂ ਹਨ। ਹਰਿਆਣਾ .'ਚ ਵੀ ਚੌਟਾਲਾ ਦੀ ਪਾਰਟੀ ਇਸ ਫਿਲਮ ਦਾ ਵਿਰੋਧ ਕਰ ਰਹੀ ਹੈ।
ਡੇਰਾ ਮੁਖੀ ਗੁਰਮੀਤ ਰਾਮ ਰਹੀਮ ਬਹੁਤ ਦੇਰ ਤੋਂ ਵਿਵਾਦਾਂ 'ਚ ਹੈ। ਉਸ 'ਤੇ ਕਤਲ ਸਮੇਤ ਕਈ ਸੰਗੀਨ ਮੁਕੱਦਮੇ ਚੱਲ ਰਹੇ ਹਨ। ਉਹ ਸੀ.ਬੀ.ਆਈ. ਜਾਂਚ ਦਾ ਸਾਹਮਣਾ ਕਰ ਰਿਹਾ ਹੈ। ਡੇਰਾ ਮੁਖੀ ਹਵਾ ਦਾ ਰੁਖ ਭਾਂਪਣ 'ਚ ਮਾਹਿਰ ਹੈ। ਪਹਿਲਾਂ ਉਹ ਕਾਂਗਰਸ ਦਾ ਸਮਰਥਕ ਰਿਹਾ ਹੈ ਤੇ ਹੁਣ ਉਸਨੇ ਪਿਛਲੀਆਂ ਲੋਕ ਸਭਾ ਚੋਣਾਂ 'ਚ ਭਾਜਪਾ ਦਾ ਸਮਰਥਨ ਕੀਤਾ ਸੀ। ਉਸ ਦੇ ਸ਼ਰਧਾਲੂਆਂ ਦੀ ਗਿਣਤੀ ਲੱਖਾਂ 'ਚ ਹੈ। ਉਸਦੀ ਫਿਲਮ ਦੀ ਮੀਡੀਆ 'ਚ ਹੋ ਰਹੀ ਚਰਚਾ ਅਨੁਸਾਰ ਫਿਲਮ 'ਚ ਉਸ ਨੂੰ ਰੱਬ ਦਾ ਰੂਪ ਹੀ ਦੱਸਿਆ ਗਿਆ ਹੈ। ਇਸ ਤੋਂ ਪਹਿਲਾਂ ਉਹ ਗੁਰੂ ਗੋਬਿੰਦ ਸਿੰਘ ਜੀ ਵਰਗੀ ਪੁਸ਼ਾਕ ਪਾ ਕੇ 'ਜਾਮ-ਇ-ਇੰਸਾਂ' ਛਕਾਉਣ ਕਾਰਨ ਸਿੱਖ ਭਾਈਚਾਰੇ ਦੀ ਨਫਰਤ ਦਾ ਪਾਤਰ ਬਣਿਆ ਸੀ। ਕਿਉਂਕਿ ਉਸ ਕੋਲ ਵੋਟ ਬੈਂਕ ਤਕੜਾ ਹੈ, ਇਸ ਲਈ ਉਸਨੂੰ ਕੋਈ ਵੀ ਛੇਤੀ ਕੀਤੇ ਹੱਥ ਪਾਉਣ .ਨੂੰ ਤਿਆਰ ਨਹੀਂ। ਇਸ ਤਰ੍ਹਾਂ ਮਸਲਾ ਕੀ ਠੀਕ-ਕੀ ਗਲਤ ਦਾ ਨਹੀਂ, ਮਾਮਲਾ ਵੋਟਾਂ ਦਾ ਹੈ। ਇਹਨਾਂ ਵੋਟਾਂ ਦੇ ਮੱਦੇਨਜ਼ਰ ਉਸ ਦੀ ਫਿਲਮ ਨੂੰ ਹਰੀ ਝੰਡੀ ਮਿਲੀ ਹੈ। ਇਕ ਚੈਨਲ ਨੇ ਤਾਂ ਇਹ ਵੀ ਦਿਖਾ ਦਿੱਤਾ ਹੈ ਕਿ ਸੈਂਸਰ ਬੋਰਡ ਦਾ ਨਵਾਂ ਮੁਖੀ ਨਿਹਲਾਨੀ ਵੀ ਡੇਰਾ ਮੁਖੀ ਦਾ ਹੀ ਮੁਰੀਦ ਹੈ।
ਮਸਲਾ ਅਸਲ 'ਚ ਕਿਸੇ ਵੀ ਸੰਸਥਾ ਦੇ ਕੰਮਕਾਜ 'ਚ ਸਰਕਾਰ ਦੇ ਦਖਲ ਦਾ ਨਹੀਂ ਹੈ। ਮਸਲਾ ਇਹ ਹੈ ਕਿ ਦਖਲ ਦਿੱਤਾ ਕਿਸ ਮਕਸਦ ਲਈ ਜਾ ਰਿਹਾ ਹੈ। ਫਿਲਮਾਂ 'ਚ ਅਸ਼ਲੀਲਤਾ, ਹਿੰਸਾ ਹੱਦਾਂ ਬੰਨੇ ਟੱਪ ਗਈ ਹੈ, ਅੰਧ ਵਿਸ਼ਵਾਸ਼ ਨੂੰ ਬੜ੍ਹਾਵਾ ਦੇਣ ਵਾਲੀਆਂ ਫਿਲਮਾਂ ਦੀ ਕੋਈ ਥੋੜ ਨਹੀਂ ਹੈ। ਦਖਲ ਤਾਂ ਇਹਨਾਂ ਫਿਲਮਾਂ ਨੂੰ ਰੋਕਣ ਲਈ ਦਿੱਤਾ ਜਾਣਾ ਚਾਹੀਦਾ ਹੈ ਪਰ ਹੋ ਉਲਟ ਰਿਹਾ ਹੈ।
ਭਾਜਪਾ ਨਾਲ ਜੁੜੀਆਂ ਸੰਸਥਾਵਾਂ, ਜਥੇਬੰਦੀਆਂ ਤਾਂ ਲੜਕੀਆਂ ਦੇ ਜੀਨ ਦੀ ਪੈਂਟ ਪਾਉਣ 'ਤੇ ਇਤਰਾਜ ਕਰਦੀਆਂ ਆ ਰਹੀਆਂ ਹਨ। ਉਹ ਹਿੰਦੂ ਲੜਕੀਆਂ ਵਲੋਂ ਕਿਸੇ ਦੂਸਰੇ ਧਰਮ, ਖਾਸਕਰ ਮੁਸਲਿਮ ਲੜਕੇ ਨਾਲ ਵਿਆਹ ਕਰਵਾਉਣ 'ਤੇ ਤੂਫ਼ਾਨ ਖੜਾ ਕਰ ਦਿੰਦੀਆਂ ਹਨ। ਇਹੋ ਜਿਹੀ ਕੱਟੜ ਵਿਚਾਰਧਾਰਾ ਨਾਲ ਜੁੜੇ ਲੋਕ ਜਦ ਸੈਂਸਰ ਬੋਰਡ 'ਚ ਬੈਠਣਗੇ ਤਾਂ ਉਹ ਸਮਾਜ ਦਾ ਕੀ ਭਲਾ ਕਰਨਗੇ? ਕਿਸੇ ਨੂੰ ਕੋਈ ਸ਼ੱਕ ਨਹੀਂ ਰਹਿਣਾ ਚਾਹੀਦਾ।
ਇਸ ਲਈ, ਆਵਾਜ਼ ਸੈਂਸਰ ਬੋਰਡ ਦੇ ਕੰਮ ਕਾਜ 'ਚ ਦਖਲ ਜਾਂ ਦਬਾਅ ਵਿਰੁੱਧ ਨਹੀਂ, ਸਗੋਂ ਅਜਿਹੇ ਸੈਂਸਰ ਬੋਰਡ ਦੇ ਗਠਨ ਲਈ ਉਠਣੀ ਚਾਹੀਦੀ ਹੈ ਜਿਸ ਵਿਚ ਪ੍ਰਗਤੀਵਾਦੀ, ਸਿਹਤਮੰਦ ਕਦਰਾਂ-ਕੀਮਤਾਂ ਨੂੰ ਪ੍ਰਣਾਈ ਵਿਚਾਰਧਾਰਾ ਵਾਲੀਆਂ ਸ਼ਖਸ਼ੀਅਤਾਂ ਨੂੰ ਅੱਗੇ ਲਿਆਂਦਾ ਜਾਵੇ ਤਾਂਕਿ ਉਹ ਰੂੜ੍ਹੀਵਾਦ ਵਿਰੁੱਧ ਬਣ ਰਹੀਆਂ ਫਿਲਮਾਂ ਨੂੰ ਅੱਗੇ ਲਿਆ ਸਕਣ ਅਤੇ ਵੇਲਾ ਵਿਹਾਅ ਚੁੱਕੀ ਸੌੜੀ ਮਾਨਸਿਕਤਾ ਵਾਲੀ ਵਿਚਾਰਧਾਰਾ ਨੂੰ ਬੜਾਵਾ ਦੇਣ ਵਾਲੀਆਂ ਫਿਲਮਾਂ 'ਤੇ ਰੋਕ ਲਾ ਸਕਣ।
 

ਬੇਰੁਜ਼ਗਾਰ ਲਾਈਨਮੈਨ ਵਲੋਂ ਆਤਮਦਾਹ ਦੀ ਕੋਸ਼ਿਸ਼
ਮੁਕਤਸਰ 'ਚ ਮਾਘੀ ਦੇ ਮੇਲੇ ਮੌਕੇ ਸੱਤਾਧਾਰੀ ਸ਼੍ਰੋਮਣੀ ਅਕਾਲੀ ਦਲ ਦੀ ਰੈਲੀ ਵਾਲੇ ਪੰਡਾਲ ਦੇ ਸਾਹਮਣੇ ਇਕ 32 ਸਾਲਾ ਬੇਰੁਜ਼ਗਾਰ ਲਾਈਨਮੈਨ ਹਿਤੇਸ਼ ਕੁਮਾਰ ਨੇ ਖੁਦ 'ਤੇ ਪੈਟਰੋਲ ਪਾ ਕੇ ਆਤਮਦਾਹ ਦੀ ਕੋਸ਼ਿਸ ਕੀਤੀ ਪਰ ਉਸ ਦੇ ਸਾਥੀਆਂ ਅਤੇ ਪੁਲਸ ਮੁਲਾਜ਼ਮਾਂ ਦੀ ਫੁਰਤੀ ਨੇ ਉਸ ਨੂੰ ਬਚਾਅ ਲਿਆ। ਉਸਦੇ ਕੱਪੜਿਆਂ ਨੂੰ ਲੱਗੀ ਅੱਗ ਬੁਝਾ ਕੇ ਉਸ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ। ਪਾਵਰਕਾਮ 'ਚ 4000 ਬੇਰੁਜ਼ਗਾਰ ਲਾਈਨਮੈਨਾਂ ਦੀ ਭਰਤੀ ਦੀ ਮੰਗ ਨੂੰ ਲੈ ਕੇ ਬੇਰੁਜ਼ਗਾਰ ਲਾਈਨਮੈਨ ਯੂਨੀਅਨ ਲੰਮੇ ਸਮੇਂ ਤੋਂ ਸੰਘਰਸ਼ ਕਰ ਰਹੀ ਹੈ। ਮਾਘੀ ਮੇਲੇ ਵਾਲੇ ਦਿਨ 20-25 ਬੇਰੁਜ਼ਗਾਰ ਸੱਤਾਧਾਰੀ ਪਾਰਟੀ ਦੇ ਪੰਡਾਲ ਦੇ ਆਸਪਾਸ ਇਕੱਠੇ ਹੋ ਗਏ। ਸਟੇਜ ਤੋਂ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੇ ਜਦ ਨਸ਼ਿਆਂ ਨੂੰ ਨੱਥ ਪਾਉਣ ਅਤੇ ਬੇਰੁਜ਼ਗਾਰੀ ਖਤਮ ਕਰਨ ਦਾ ਦਾਅਵਾ ਕੀਤਾ ਹੀ ਸੀ ਤਾਂ ਪੰਡਾਲ ਵੱਲ ਆਪਣੇ ਸਾਥੀਆਂ ਨਾਲ ਜਾ ਰਹੇ ਹਿਤੇਸ਼ ਨੇ ਆਪਣੇ ਕੱਪੜਿਆਂ ਨੂੰ ਅੱਗ ਲਾ ਲਈ।
ਇਸ ਅਫਸੋਸਨਾਕ ਘਟਨਾ ਤੋਂ ਬਾਅਦ 21 ਜਨਵਰੀ ਨੂੰ, ਜਦ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਧੂਰੀ ਹਲਕੇ ਦੇ ਪਿੰਡਾਂ 'ਚ ਸੰਗਤ ਦਰਸ਼ਨਾਂ ਦੀ ਝੜੀ ਲਾਉਣੀ ਸੀ, ਤੜਕੇ ਸਵੇਰ ਧੂਰੀ ਪਿੰਡ ਬੇਨੜਾ ਦਰਬਾਜਾਂ ਨੇੜੇ ਸਟੇਡੀਅਮ 'ਚ ਸਥਿਤ ਪਾਣੀ ਵਾਲੀ ਟੈਂਕੀ 'ਤੇ ਬੇਰੁਜ਼ਗਾਰ ਲਾਈਨਮੈਨ ਯੂਨੀਅਨ ਦੇ ਤਿੰਨ ਕਾਰਕੁੰਨ ਪੈਟਰੋਲ ਦੀਆਂ ਬੋਤਲਾਂ ਨੂੰ ਲੈ ਕੇ ਜਾ ਚੜ੍ਹੇ ਅਤੇ ਉਨ੍ਹਾਂ  ਨੇ ਆਪਣੇ ਬੇਰੁਜ਼ਗਾਰ ਲਾਈਨਮੈਨ ਸਾਥੀਆਂ ਨੂੰ ਨਿਯੁਕਤੀ ਪੱਤਰ ਜਾਰੀ ਕਰਨ ਦੀ ਮੰਗ ਨੂੰ ਲੈ ਕੇ ਪੰਜਾਬ ਸਰਕਾਰ ਖਿਲਾਫ ਨਾਅਰੇ ਲਾਉਣੇ ਸ਼ੁਰੂ ਕਰ ਦਿੱਤੇ। ਪੈਟਰੋਲ ਦੀਆਂ ਬੋਤਲਾਂ ਤੇ ਮਾਚਿਸਾਂ ਹੱਥਾਂ 'ਚ ਫੜੀ ਇਹ ਕਾਰਕੁੰਨ ਆਪਣੇ ਸਾਥੀਆਂ ਲਈ ਰੁਜ਼ਗਾਰ ਅਤੇ ਆਤਮਦਾਹ ਦੀ ਕੋਸ਼ਿਸ਼ ਕਰਨ ਵਾਲੇ ਹਿਤੇਸ਼ ਕੁਮਾਰ ਵਿਰੁੱਧ ਦਰਜ ਕੇਸ ਨੂੰ ਰੱਦ ਕਰਨ ਦੀ ਮੰਗ ਕਰ ਰਹੇ ਸਨ। ਐਸ.ਐਚ.ਓ ਸਿਟੀ ਵਲੋਂ ਇਨ੍ਹਾਂ ਨੌਜਵਾਨਾਂ ਨੂੰ ਹੇਠਾਂ ਉਤਰ ਕੇ ਪ੍ਰਸ਼ਾਸਨ ਨਾਲ ਗੱਲਬਾਤ ਦਾ ਰਾਹ ਅਪਣਾਉਣ ਲਈ ਪ੍ਰੇਰਿਆ ਪਰ ਉਹ ਮੁੱਖ ਮੰਤਰੀ ਵਲੋਂ ਮੰਗਾਂ ਮੰਨੇ ਜਾਣ ਦੇ ਭਰੋਸੇ ਤੋਂ ਘੱਟ ਕਿਸੇ ਗੱਲ ਲਈ ਤਿਆਰ ਨਾ ਹੋਏ। 22 ਜਨਵਰੀ ਨੂੰ ਉਨ੍ਹਾਂ ਦਾ ਇਕ ਹੋਰ ਸਾਥੀ ਸਵੇਰ ਵੇਲੇ ਪੁਲਸ ਨੂੰ ਚਕਮਾ ਦੇ ਕੇ ਪੈਟਰੋਲ ਦੀ ਬੋਤਲ ਸਮੇਤ ਟੈਂਕੀ 'ਤੇ ਜਾ ਚੜ੍ਹਿਆ।
23 ਜਨਵਰੀ ਨੂੰ ਜਦ ਇਨ੍ਹਾਂ ਬੇਰੁਜ਼ਗਾਰਾਂ 'ਚੋਂ ਇੱਕ ਨੇ ਆਪਣੇ 'ਤੇ ਪੈਟਰੋਲ ਪਾ ਕੇ ਅੱਗ ਲਾਉਣ ਅਤੇ ਦੂਸਰੇ ਨੇ ਟੈਂਕੀ ਤੋਂ ਹੇਠਾਂ ਕੁੱਦ ਕੇ ਜਾਨ ਦੇਣ ਦੀ ਧਮਕੀ ਦਿੱਤੀ ਤਾਂ ਪ੍ਰਸ਼ਾਸਨ ਦੇ ਹੱਥ ਪੈਰ ਫੁੱਲ ਗਏ।
ਇਨ੍ਹਾਂ ਬੇਰੁਜ਼ਗਾਰ ਲਾਈਨਮੈਨਾਂ 'ਚ ਇਸ ਗੱਲ ਨੂੰ ਲੈ ਕੇ ਸਖਤ ਰੋਹ ਹੈ ਕਿ ਸਰਕਾਰ ਨੇ ਉਨ੍ਹਾਂ ਨੂੰ ਨਿਯੁਕਤੀ ਪੱਤਰ ਜਾਰੀ ਕਰਨ ਦੀ ਬਜਾਇ ਪਾਵਰਕਾਮ 'ਚ ਲਾਈਨਮੈਨਾਂ ਦੀ ਭਰਤੀ ਦਾ ਨਵਾਂ ਇਸ਼ਤਿਹਾਰ ਜਾਰੀ ਕਰਕੇ ਉਨ੍ਹਾਂ ਨਾਲ ਧੋਖਾ ਕੀਤਾ ਹੈ। 23 ਜਨਵਰੀ ਨੂੰ ਜਦ ਇਨ੍ਹਾਂ ਬੇਰੁਜ਼ਗਾਰਾਂ 'ਚੋਂ ਇਕ ਨੇ ਆਪਣੇ 'ਤੇ ਪੈਟਰੋਲ ਪਾ ਕੇ ਅੱਗ ਲਾਉਣ ਅਤੇ ਦੂਸਰੇ ਨੇ ਟੈਂਕੀ ਤੋਂ ਹੇਠਾਂ ਕੁੱਦ ਕੇ ਜਾਨ ਦੇਣ ਦੀ ਧਮਕੀ ਦਿੱਤੀ ਤਾਂ ਪ੍ਰਸ਼ਾਸਨ ਦੇ ਹੱਥ ਪੈਰ ਫੁੱਲ ਗਏ।
ਇਨ੍ਹਾਂ ਬੇਰੁਜ਼ਗਾਰ ਲਾਈਨਮੈਨਾਂ 'ਚ ਇਸ ਗੱਲ ਨੂੰ ਲੈ ਕੇ ਸਖਤ ਰੋਹ ਹੈ ਕਿ ਸਰਕਾਰ ਨੇ ਉਨ੍ਹਾਂ ਨੂੰ ਨਿਯੁਕਤੀ ਪੱਧਰ ਜਾਰੀ ਕਰਨ ਦੀ ਬਜਾਇ ਪਾਵਰਕਾਮ 'ਚ ਲਾਈਨਮੈਨਾਂ ਦੀ ਭਰਤੀ ਦਾ ਨਵਾਂ ਇਸ਼ਤਿਹਾਰ ਜਾਰੀ ਕਰਕੇ ਉਨ੍ਹਾਂ ਨਾਲ ਧੋਖਾ ਕੀਤਾ ਹੈ। 23 ਜਨਵਰੀ ਨੂੰ ਟੈਂਕੀ 'ਤੇ ਚੜੇ ਨੌਜਵਾਨ ਵਲੋਂ ਦਿੱਤੀ ਗਈ ਅੰਤਿਮ ਚੇਤਾਵਨੀ ਦੇ ਮੱਦੇਨਜ਼ਰ ਮੌਕੇ 'ਤੇ ਮੌਜੂਦ ਐਸ.ਐਚ.ਓ. ਸਿਟੀ ਨੇ ਉਚ ਅਧਿਕਾਰੀਆਂ ਰਾਹੀਂ ਜਥੇਬੰਦੀ ਦੇ ਸੂਬਾਈ ਆਗੂਆਂ ਦੀ ਧੂਰੀ ਹਲਕੇ 'ਚ ਹੀ ਸੰਗਤ ਦਰਸ਼ਨਾਂ ਦੌਰਾਨ ਮੁੱਖ ਮੰਤਰੀ ਨਾਲ ਗੱਲਬਾਤ ਕਰਵਾਈ। ਮੁੱਖ ਮੰਤਰੀ ਵਲੋਂ ਪਾਵਰ ਸੈਕਟਰੀ ਨੂੰ ਇਕ ਹਜ਼ਾਰ ਲਾਈਨਮੈਨਾਂ ਦੀ ਭਰਤੀ ਦਾ ਇਸ਼ਤਿਹਾਰ ਤੁਰੰਤ ਵਾਪਸ ਲੈਣ ਅਤੇ 2011 ਤੋਂ ਚਲ ਰਹੀ ਲਾਈਨਮੈਨਾਂ ਦੀ ਭਰਤੀ ਪ੍ਰਕਿਰਿਆ ਤੇਜੀ ਪੂਰੀ ਕਰਨ ਦੀ ਹਦਾਇਤ ਦਿੱਤੀ ਗਈ ਅਤੇ ਮੁਕਤਸਰ 'ਚ ਗ੍ਰਿਫਤਾਰ ਕੀਤੇ ਗਏ ਚਾਰ ਕਾਰਕੁੰਨਾਂ ਦੀ ਰਿਹਾਈ ਦੇ ਹੁਕਮ ਵੀ ਦਿੱਤੇ ਗਏ। ਇਹ ਭਰੋਸਾ ਮਿਲਣ 'ਤੇ ਟੈਂਕੀ 'ਤੇ ਚੜ੍ਹੇ ਨੌਜਵਾਨ ਹੇਠਾਂ ਉਤਰ ਆਏ। ਖੁਦਕੁਸ਼ੀ ਆਤਮਦਾਹ ਕਿਸੇ ਵੀ ਸਮੱਸਿਆ ਦਾ ਹੱਲ ਨਹੀਂ ਹੈ ਪਰ ਸਾਡੇ ਹੁਕਮਰਾਨਾਂ ਦੀਆਂ ਨੀਤੀਆਂ ਨੇ ਬੇਰੁਜ਼ਗਾਰਾਂ ਨੂੰ ਇਨਾਂ ਨਿਤਾਣਾ ਬਣਾ ਦਿੱਤਾ ਹੈ ਕਿ ਉਹ ਇਹ ਅੱਤ ਦਾ ਕਦਮ ਚੁੱਕਣ ਤੱਕ ਚਲੇ ਜਾਂਦੇ ਹਨ। ਜਦ ਕੋਈ ਬੇਰੁਜ਼ਗਾਰ ਟੈਂਕੀਆਂ ਤੇ ਜਾ ਚੜ੍ਹਦਾ ਹੈ, ਕੋਈ ਪੈਟਰੋਲ ਛਿੜਕ ਕੇ ਆਤਮ ਦਾਹ ਦੀ ਕੋਸ਼ਿਸ਼ ਕਰਦਾ ਹੈ ਤਾਂ ਸਰਕਾਰ ਵਲੋਂ ਮੰਗਾਂ ਮੰਨਣ ਪ੍ਰਤੀ ਥੋੜ੍ਹੀ ਕੁ ਹਿਲਜੁਲ ਕੀਤੀ ਜਾਂਦੀ ਹੈ ਪਰ ਬਾਅਦ 'ਚ ਪਰਨਾਲਾ ਫਿਰ ਉਥੇ ਦਾ ਉਥੇ ਆ ਜਾਂਦਾ ਹੈ।
ਆਸ ਕਰਨੀ ਬਣਦੀ ਹੈ ਕਿ ਬੇਰੁਜ਼ਗਾਰੀ ਲਾਈਨਮੈਨਾਂ ਨੂੰ ਦਿੱਤੇ ਗਏ ਭਰੋਸੇ ਨਾਲ ਸਰਕਾਰ ਵਫਾ ਕਮਾਏਗੀ। ਬੇਰੁਜ਼ਗਾਰਾਂ, ਚਾਹੇ ਉਹ ਲਾਈਨਮੈਨ ਹੋਣ ਜਾਂ ਅਧਿਆਪਕ ਜਾਂ ਕੋਈ ਹੋਰ, ਨੂੰ ਵੀ ਚਾਹੀਦਾ ਹੈ ਕਿ ਉਹ ਖੁਦਕੁਸ਼ੀਆਂ ਦਾ ਰਾਹ ਤਿਆਗ ਕੇ ਜਥੇਬੰਦਕ ਸੰਘਰਸ਼ 'ਤੇ ਹੀ ਟੇਕ ਰੱਖਣ। ਜਥੇਬੰਦਕ ਸੰਘਰਸ਼ ਹੀ ਇਕੋ ਇਕ ਰਾਹ ਹੈ ਜਿਸ ਨਾਲ ਹਰ ਮੁਸ਼ਕਲ ਪਾਰ ਪਾਈ ਜਾ ਸਕਦੀ ਹੈ।             

- ਇੰਦਰਜੀਤ ਚੁਗਾਵਾਂ