ਸ਼ੋਕ ਸਮਾਚਾਰ

ਚੌਧਰੀ ਗੁਰਬਚਨ ਸਿੰਘ ਨਹੀਂ ਰਹੇ  

ਉਘੇ ਮੁਲਾਜ਼ਮ ਆਗੂ ਅਤੇ ਸੀ.ਪੀ.ਆਈ.(ਐਮ) ਦੇ ਸੂਬਾ ਦਫਤਰ ਦੇ ਸਕੱਤਰ ਰਹੇ ਸਾਥੀ ਗੁਰਬਚਨ ਸਿੰਘ ਚੌਧਰੀ 8 ਜਨਵਰੀ ਨੂੰ ਕਨਾਡਾ ਵਿਖੇ ਸਦੀਵੀ ਵਿਛੋੜਾ ਦੇ ਗਏ। ਪੰਜਾਬ ਦੀ ਮੁਲਾਜ਼ਮ ਲਹਿਰ ਨੂੰ ਉਸਾਰਨ ਵਿਚ ਸਾਥੀ ਚੌਧਰੀ ਦਾ ਬੜਾ ਉਭਰਵਾਂ ਯੋਗਦਾਨ ਰਿਹਾ ਅਤੇ 1984 ਵਿਚ ਸੇਵਾਮੁਕਤੀ ਉਪਰੰਤ ਉਹ ਇਕ ਪ੍ਰਤੀਬੱਧ ਕਮਿਊਨਿਸਟ ਵਜੋਂ ਕੁਲਵਕਤੀ ਦੇ ਤੌਰ 'ਤੇ ਪਾਰਟੀ ਦਫਤਰ ਵਿਚ ਆ ਗਏ ਸਨ। 70 ਸਾਲ ਦੀ ਉਮਰ ਉਪਰੰਤ ਉਹ ਆਪਣੇ ਪੁੱਤਰ ਕੋਲ ਕਨਾਡਾ ਚਲੇ ਗਏ ਅਤੇ ਉਥੋਂ ਦੀ ਕਮਿਊਨਿਸਟ ਲਹਿਰ ਦਾ ਹਿੱਸਾ ਬਣ ਗਏ।
ਉਥੇ ਰਹਿੰਦੇ ਹੋਏ ਉਨ੍ਹਾਂ ਨੇ 'ਸੰਗਰਾਮੀ ਲਹਿਰ' ਪਰਚੇ ਨੂੰ ਪ੍ਰਮੋਟ ਕਰਨ ਵਿਚ ਵੀ ਚੰਗਾ ਯੋਗਦਾਨ ਪਾਇਆ। ਅਦਾਰਾ 'ਸੰਗਰਾਮੀ ਲਹਿਰ' ਉਨ੍ਹਾਂ ਦੇ ਇਸ ਸਦੀਵੀਂ ਵਿਛੋੜੇ ਮੌਕੇ ਡੂੰਘੇ ਦੁੱਖ ਦਾ ਇਜ਼ਹਾਰ ਕਰਦਾ ਹੈ ਅਤੇ ਉਨ੍ਹਾਂ ਦੇ ਪਰਿਵਾਰ ਪ੍ਰਤੀ ਡੂੰਘੀ ਸੰਵੇਦਨਾ ਦਾ ਪ੍ਰਗਟਾਵਾ ਕਰਦਾ ਹੈ।


ਸਾਥੀ ਸ਼ਲਿੰਦਰ ਸਿੰਘ ਜੌਹਲ ਦਾ ਦਰਦਨਾਕ ਵਿਛੋੜਾ  

ਪਾਰਟੀ ਸਫਾਂ ਵਿਸ਼ੇਸ਼ ਤੌਰ 'ਤੇ ਮੁਲਾਜ਼ਮਾਂ ਦਰਮਿਆਨ ਇਹ ਗੱਲ ਬੜੇ ਦੁੱਖ ਨਾਲ ਸੁਣੀ ਜਾਵੇਗੀ ਕਿ ਜਲੰਧਰ ਜ਼ਿਲ੍ਹੇ ਦੇ ਉਘੇ ਮੁਲਾਜ਼ਮ ਆਗੂ ਸਾਥੀ ਸ਼ਲਿੰਦਰ ਸਿੰਘ ਜੌਹਲ 2 ਜਨਵਰੀ ਨੂੰ ਸਦੀਵੀਂ ਵਿਛੋੜਾ ਦੇ ਗਏ ਹਨ। ਪਹਿਲੀ ਜਨਵਰੀ ਨੂੰ ਉਨ੍ਹਾਂ ਦੀ ਬੇਟੀ ਦੀ ਸ਼ਾਦੀ ਸੀ। ਇਸ ਸ਼ੁਭ ਕਾਰਜ ਤੋਂ ਸੁਰਖਰੂ ਹੋ ਕੇ ਉਹ ਰਾਤ ਨੂੰ ਸੁੱਤੇ ਪ੍ਰੰਤੂ ਦਿਲ ਦਾ ਦੌਰਾ ਪੈਣ ਕਾਰਨ ਦੂਜੇ ਦਿਨ ਉਠ ਨਹੀਂ ਸਕੇ। ਉਹ ਅਦਾਰਾ 'ਸੰਗਰਾਮੀ ਲਹਿਰ' ਨਾਲ ਵੀ ਕੁੱਝ ਸਮਾਂ ਜੁੜੇ ਰਹੇ। ਅਦਾਰਾ 'ਸੰਗਰਾਮੀ ਲਹਿਰ' ਉਨ੍ਹਾਂ ਦੀ ਇਸ ਬੇਵਕਤ ਮੌਤ 'ਤੇ ਉਨ੍ਹਾਂ ਦੇ ਪਰਿਵਾਰ ਤੇ ਸਨੇਹੀਆਂ ਦੇ ਦੁੱਖ ਵਿਚ ਸ਼ਰੀਕ ਹੁੰਦਾ ਹੈ।